వన్నెలాడి వశీకరణం
వన్నెలాడి వశీకరణం
బుల్లితెర బంధించే మాయచెర
చల్లగా జేబుకు చిల్లుపెట్టు ఎర
కళ్ళను కప్పేసిన కనికట్టు పొర
కల్లబొల్లి ఊసులు వల్లించే పిట్టలదొర
ఆపుటకు ఆస్కారంలేని అయస్కాంతమై ఆకట్టుకునేది
గజదొంగలా సమయాన్ని అమాంతం కొల్లగొట్టేది
ఉప్మాలో జీడిపప్పులా ప్రకటనల నడుమ ప్రోగ్రాములిచ్చేది
న్యాయవాదిలా పనులను ఊరకనే వాయిదా వేయించునది
మానవసంబంధాలను కనుమరుగుచేసి కళ్ళకు గంతలు కట్టేది
ఉత్కంఠతో ఊపిరాపి బీపీ రేపే లవణకేంద్రమిది
నిద్రమాత్రలను సైతం నిర్వీర్యంచేసే నిపుణురాలు
విరుగుడుకు వీలులేని వశీకరణ వేసే వగలాడి
ఊబకాయుల్ని ఉత్పత్తిచేసే కర్మాగారమిది
చిక్కకుండా నేరంచేసే నైపుణ్యాలను నూరిపోసే నేర్పరి
నటనకు ద్రవీభవించి నిజానికి ఘనీభవింపచేసే కిలాడి
-ప్రశాంత్