నేను - నా నిద్దర పంచాయితీ

కళ్ళలో నిజం కనిపిస్తుంది

మాటలో అబద్ధం ధ్వనిస్తుంది

ఆసక్తిలో నిర్లక్ష్యం

అనాసక్తిలో దౌర్బల్యం

అసలీ అలవాట్లున్నాయే

అదే అలవాట్లంటే మరీ చెడ్డవి కావు 

కొంత ద్వేషం నాకు నాపైన

ఇంకొంత మరి కొందరి మీద

అసలు అలవాట్లు ఎందుకుంటాయి

నిద్రపోవడం కూడా అలవాటే కదా

మరెందుకు కుదరట్లేదు 

బహుశా ఇప్పటివరకూ పోయిన నిద్ర చాలనా

లేక నిద్ర రాకుండా రోగమేమైనా వచ్చిందా

ఎవర్ని అడిగినా ఒకటే మాట

నిద్దర రాకపోతే మంచిదేగా

కాసేపు ఎక్కువ పని చెయ్యొచ్చు

కూలి డబ్బులు ఎక్కువొస్తాయి

అవును

కూలి డబ్బులు 

ఆ తాగుబాతు ఎంకటిగాడు కల్లు తాగే డబ్బులు

సుబ్బి కన్ను కొట్టి అడిగే డబ్బులు

నిద్దరపోనివ్వని కూలి డబ్బులు

వార్నీ పాసుగాల ఇప్పుడు తెలిసింది

నిద్దర ఎందుకు రాలేదో