Library
Profile
స్మశాన వైరాగ్యం
స్మశాన వైరాగ్యం
జారే కన్నీటి చుక్కలతో
సముద్రంలోని ఉప్పదనం పెరిగింది
నడుస్తూ వెళుతూ ఉంటే
ఇష్టం లేని ప్రయాణానికి నీడ వీడ్కోలు చెప్పేసింది
చేతిలో నుండి సూట్ కేస్ పడిపోయింది
అందులో ఏవో కాగితాలు
కొన్ని నల్లవి కొన్ని తెల్లవి
అవన్నీ గాలికి ఎగిరిపోయాయి
పచ్చ కాగితాలు మాత్రమే పట్టించుకునే వాళ్ళకి
అవి కనిపించలేదు
కాళ్ళు ఇసుకను ముద్దాడుతున్నాయి
చేతులకు గవ్వలు దొరికాయి
మాసిపోయిన బాల్యమేదో
ముసురుపట్టిన మబ్బులా వచ్చింది
దూరంగా
మిక్చర్ అమ్ముతున్న కుర్రాడు
ఫోటోలు తీసుకుంటున్న కొత్త జంట
వీటన్నిటి మధ్య
తర్పణం మధ్య వదిలి వెళ్ళిపోతున్న ఓ కుటుంబం
ఇష్టంగా వెళ్లిపోతున్నారు
అంటే
కష్టాన్ని ఓర్చుకున్నారనా
సహజంగా ఇలా ఉండాలనా
స్మశాన వైరాగ్యం
లాటరీ టికెట్ల ఫలితాల్లోనా
ఉద్యోగం పోయిన రోజుల్లోనా
ఆమె దూరమైన క్షణాల్లోనా
అతనికి అర్థం కాలేదు
గట్టిగా నవ్వాడు
వెంటనే ఏడ్చాడు
అలలు ఆ శబ్దాలను తీసుకెళ్ళిపోయాయి
అక్కడేదో ప్రశాంతత..
