సాగర తీరాన స్నేహం

పిల్లలేనా ఇసుకలో ఇళ్లు కట్టేది

ఈసారికి పిల్లల్లానే మేమూ ఇళ్ళు కట్టేసాం

బీచ్ ఒడ్డున ఎగురుతూ

అలలతో దాగుడుమూతలు ఆడుతూ

అటూ ఇటూ పరిగెడుతూ

మెల్లిగా నీళ్లతో పరుగులు

కొద్దిగా లోతు తెలిశాక అరుపులు

దారిలో కొన్న మొక్కజొన్న పొత్తు పరిమళం

ముక్కులోకి చెవుల్లోకి వద్దన్నా చొరబడి

కాస్త కళ్లకూ తగిలి

మంట పుట్టిస్తోన్న సముద్రపు ఉప్పు నీరు

ఎక్కడో గాలి

ఇక్కడ అలల తాకిడి

గెంతుతున్న మనుష్యులు

వస్తువులకు కాపలా ఉండి 

తమ వంతు కోసం వేచి ఉన్న స్నేహితులు

అలలతో నిత్యమూ పోరాటం చేసే

గంగ పుత్రులు ఒక వైపు

అలల్నే చూస్తూ ఆ రోజు కష్టాన్ని 

సముద్రంలోకి గిరవాటేసే సగటు మనుషులు

విశాఖ సాగర తీరాన

నాకు దొరికిన స్నేహం

నువ్వు కూడా..