ఓ గ్రహాంతరవాసి

మెల్లిగా ఇంకో ముఖం తొడుక్కుంది

మనిషిలానే ఉంది

మాటా పలుకూ

నడకా నడతా

అవన్నీ మనిషిలానే అనిపిస్తాయి

మొన్న నువ్వే ప్రాణం

నిన్న నువ్వు లేకుంటే బతకలేను అని చెప్పి

ఇవాళ ముఖం తిప్పుకుంటూ నడిస్తే

అస్థిత్వపు ఉద్యమం

చీటికీ మాటికీ

కొత్త గొడవలు సృష్టించి

స్నేహితుల్ని విడదీస్తే

గ్రహాంతర వాసి అని పిలవాలేమో

పోనీ కాసేపు కాదు అనుకుందాం 

మనల్నీ తనలా మార్చేస్తే

కొంపలంటుకు పోవూ

అసలే అందరిదీ పోయేకాలంలా ఉంది

ఇలా దూరం అవుతూ

ఫోన్ కు అతుక్కుపోయి ఉంటే

మనమే ఈ గ్రహానికి కొత్త అవుతాం

ప్రకృతిని వేరే గ్రహానికి పంపి

అప్పుడు ఒకరి ముఖాన్ని ఒకరు చూసుకుంటూ

గడపాలేమో