కథగా.. కల్పనగా..

ఏదో వ్రాస్తూ ఉన్నా

శుక్ల పక్ష చంద్రుడిని గది గోడలుగా చేస్తూ

శ్రావణ వ్రత కథల్ని నదిలో నావలుగా చేస్తూ

నీ వలలోంచి బయటికి రావడానికి

శాయశక్తులా కృషి చేస్తున్నా

మదిలో ఆశలు వెచ్చని మంటను రేపుతుంటే

యవ్వనం మళ్లీ ప్రేమలో పడమంటే

పోనీ ప్రేమ పేరుతో తనువును రాసివ్వమంటే

అలసిపోయానని

వయసుకు సర్ది చెబుతున్నా

పోనీలే

ఖాళీ సమయాల్లో ఏం చేస్తుంటావ్?

అని ఎవరైనా అడిగితే

బీచ్ రోడ్డులో శ్రీశ్రీ విగ్రహంతో కొత్త కవితలు చెబుతూ ఉంటా అని నవ్వేస్తా

మరో ప్రపంచం వచ్చిందో రాలేదో

మాయా ప్రపంచమైతే వచ్చింది

నా బతుకులో మిధ్యను తెచ్చింది

ఒక కథగా కల్పనగా నన్ను మార్చింది