గాయం

స్పందించే మనసుతో మనకు

 ఎంత ఆనందం !

నొప్పించే గాయాలతోనూ

 దానికి అనుబంధం !!

ఎత్తుకుని ముద్దాడితే 

బాలల్లో చిద్విలాసం ;

ఆటవస్తువులతో 

గడిపినప్పుడు సంతోషం .

స్నేహితులతో , సరదాలతో

 తీయని అనుభూతి ;

ఆహ్లాదకరమైతే నేర్చుకొనుట

 వలన మంచిమతి .

యువతులకు ఆకర్షణను తెచ్చేది

 సౌందర్యవంతమైన శరీరం ;

మంచి దుస్తులతో , ఆభరణాలతో

 ముఖం అరవిందం .

యువకుడిని హి - మ్యాన్ 

అంటే ఎంత ఉల్లాసం !

వినోద విహారాలతో వానికి

 అనుదినం మనోహరం .

ప్రియురాలికి ప్రేమతో

 గులాబీ అందితే సంతృప్తి ;

తనే సర్వస్వం అంటే

 ఆ ఉత్సాహానికి ఏది అవధి ?

ప్రియడికి మనసున్న మగువ 

వలపొక తీరని దాహం ;

తనే ప్రాణం అంటే అడగులోనే

 అడుగు జీవితాంతం .

వివాహానంతరం ఆలుమగలలో

 సుఖం అనుక్షణం ;

సంసారసాగరంలో 

తేలియాడటం గొప్ప లక్షణం .

ఉద్యోగమైనా , వ్యాపారమైనా

 జానెడు పొట్టకోసం ;

తగిన పరిశ్రమతోనే ఉన్నతమైన

 సౌకర్యాలు అదనం .

ప్రేమాభిమానాలతో అందరూ 

ఉంటే శోభాయమానమై ,

పులకించదా పుడమితల్లి 

ప్రతిఒక్కరి గుండెలో కొలువై !

ఎప్పుడైనా , ఎవరికైనా దుఃఖం

 ఉప్పొగితే ఎంతో కష్టం ;

ఆశించినది మనకు చేరనప్పుడు

 కాదా లోపల గాయం !?

*********