ఎక్కడైనా నేనున్నానా

గుబురుగా పెరిగిన గడ్డంతో

తినేసేటువంటి చూపుల్తో

నేను నీకు కనిపించానా

లోలోపల చనిపోయి

బయటికి నవ్వే శబ్దాల్లో

నేను నీకు కనిపించానా

చేసిన వాగ్దానాలు వదిలేసి

నీతులు చెప్పే వాళ్ళలో

నేను నీకు కనిపించినా

మనుషులంతా ఒక్కటే అని చెబుతూ

మీరేమిట్లు అని అడిగే మాటల్లో

నేను నీకు కనిపించనా

తండ్రికి తెలీకుండా తాగిన సిగరెట్ పోగలో

మందు మత్తులో 

నేను నీకు కనిపించానా

అన్ని సార్లు అన్ని విషయాల్లో

నేను నీకు కనిపించానా

నేను మాత్రమే కనిపించానా

నీకు నువ్వు కనిపించలేదా

నిన్ను నువ్వు మరచిపోయావా

లేక 

నన్ను వెతుక్కుంటూ దారి తప్పిపోయావా