చలి - దుప్పటి
చలి - దుప్పటి
గాలుల్ని కాస్త ఊరుకొమ్మని
నువ్వైనా చెప్పొచ్చు కదా
నీటిని కాస్త వేడి చేయమని
సూర్యుడితో చెప్పవా
ఓ వెన్నెలా
మరింత మంటను రగుల్చు
ప్రియుని కౌగిలి లేక
పలు విధముల దుఖించు సఖికి
రవంత విశ్రాంతి కలిగించు
తల దాచుకొనే వీలు లేక
తమను తాము ఏ వీధి మూలకో
చెందిన వారుగా ఉండిపోయిన శరీరాలకు
కాస్త వేడి కలిగించు
వెచ్చటి కన్నీరు తెలియక
పరుష వాక్యముల బాధించు వారికి
కాస్త బుద్ధి కలిగేలా
కనువిప్పు కలిగించు
ఓ వెన్నెలా
ఇన్ని పనులు నీకుంటే
చలికి దుప్పటి కప్పుకుని
శిశిర కాలమున చెట్లను చూస్తున్న నన్ను
మళ్లీ మళ్లీ పిలిచెదవేల
ఏముందని నేను బయటికి రావాలి
ఎవరి విందులోనో గుప్పుమనే వార్తలా
అలా మిగల్లేక
ఇలా ఉండనీ
నను నాతో పోరాడనీ