ବର୍ଷା ଓ ପ୍ରିୟା

ପ୍ରିୟାଟା ମୋହର ବହୁତ ସୁନ୍ଦର

ଅଟେ ଟିକେ ଲାଜକୁଳୀ

ବରଷା ଆସିଲେ କୁନି ପିଲା ପରି

ଭିଜିବାକୁ କରେ ଅଳି ।

ଆଜିବି ମୋ ପ୍ରିୟା ବରଷା ଆସିଲେ

ଖାତାରୁ କାଗଜ ଚିରି

ଅଗଣାକୁ ତାର ଧାଇଁ ସେ ଯାଉଛି

କାଗଜ ଡଙ୍ଗା ଟେ କରି ।

ହସି ହସି ପ୍ରିୟା ବରଷା ଜଳକୁ

ପାପୁଲିରେ ନିଏ ତୋଳି

ନାଚି ନାଚି ପୁଣି ବରଷାରେ ଖେଳେ

ଦେହରେ କାଦୁଅ ବୋଳି ।

ଜଳରେଣୁ ଦେଖି ଆନନ୍ଦରେ ପ୍ରିୟା

ଟିପରେ ଫୁଟାଉ ଥାଏ

ସାଧବ ବୋହୂକୁ ଧରିବା ପାଇଁକି

ପଛେ ପଛେ ଧାଉଁ ଥାଏ ।

ନିଜ ଭିଜା ଦେହେ ଦେଖିଦିଏ ଯେବେ

ଲାଜରେ ଝାଉଁଳି ଯାଏ

ଲାଜେଇ ଲାଜେଇ ତଳକୁ ଚାହିଁ ସେ

ମୋ ଦେହେ ଆଉଜି ହୁଏ ।