ବଧୂ-ପ୍ରବେଶ

ରୋମାଣ୍ଟିକ କବି ମାୟାଧର ମାନସିଂହ

ଗୃହେ ବଧୂ-ବୃନ୍ଦ-ମୁଖେ ଶୁଭ ହୁଳହୁଳି,

ଗ୍ରାମଦାଣ୍ଡେ ଶୁଭ ଶଙ୍ଖ,ମଙ୍ଗଳ ମହୁରି,

ଦ୍ୱାରେ ତୁଙ୍ଗ ବାଦ୍ୟରୋଳ,ଚନ୍ଦ୍ରାତପ ତଳେ

ପ୍ରଦୀପ ଆଲୋକ ପାଶେ ମହା କୋଳାହଳେ

ଆଣିଲେ କୁଟୁମ୍ବଜନେ ବାହି ନବବଧୂ

ଦରିଦ୍ର କୁଟୀର ଦ୍ୱାରେ ।କ୍ଷୁଦ୍ର ଦୁଇ ପଦୁ

ଅଲକ୍ତ-ରକ୍ତିମ ଶୋଭା ନିଃସରି ତାହାର

ପ୍ରାଣହୀନ ମୃତ୍ତିକାରେ ଜୀବନ-ସଞ୍ଚାର

ସହସା କରିଲା କ୍ଷଣେ ।ପଟ୍ଟ-ପରିହିତା,

ନିଖିଳ କନକ-ଅଙ୍ଗେ ଭୂଷଣ-ଭୂଷିତା,

ମସ୍ତକେ ସିନ୍ଦୁର ବିନ୍ଦୁ,ନୟନେ କଜ୍ଜଳ,

ଚଉପାଶ କବରୀର ସୌରଭେ ଉଚ୍ଛଳ-

ପ୍ରବେଶନ୍ତେ ଧୀରେ ବଧୂ କୁଟୀରେ ଆମ୍ଭର

କଲ୍ୟାଣେ ହସିଲା ଯେହ୍ନେ ଗୃହର ଚତ୍ୱର ।

ସମାପ୍ତ