कविता अंतरीच्या
कविता अंतरीच्या
नवसृष्टी निर्माण करण्यास
रुजती बी उदरी धरणीच्या
अव्यक्त विचार मांडण्यास
स्फुरती कविता अंतरीच्या
सैरभैर विस्कटलेली नाती
जीवनवाटा अधांतरीच्या
वेध घेऊनी अबोल मनाचे
प्रगटती कविता अंतरीच्या
कधी साजरे जन्म सोहळे
तर कधी वेदना मरणाच्या
आरंभ ते अंत मधल्या रेषा
रेखाटती कविता अंतरीच्या
आयुष्य व्यथा संघर्षमयी
मर्मज्ञ भावकल्लोळाच्या
भावतरंग उठतात हळूवार
पाझरती कविता अंतरीच्या
जातिवाद, अराजकतेचे ग्रहण
खिंडार पडे एकतेस देशाच्या
अहिंसा लेखणीरुपी शस्त्राने
अवतरती कविता अंतरीच्या
अज्ञानाचा अंधार मिटविण्या
ज्योती चेतवाव्या शिक्षणाच्या
उजळूनी अवघ्या आसमंतास
लखलखती कविता अंतरीच्या