मनाची वंचना (गझल)
मनाची वंचना (गझल)
या मनाची वंचना, सांगू कुणाला ?
या तनाची यातना सांगू कुणाला?
मार, छळ सोसायचा आता किती मी ?
जीवघेणी वेदना, सांगू कुणाला ?
वाद मिटवूनी, करावे प्रेम तुजवर
ही जिवाची कामना, सांगू कुणाला?
मी जगावे की मरावे ? पोरकी मी
दाटती या भावना, सांगू कुणाला ?
दुःख की आनंद आहे रे कळेना ?
आज ही संभावना, सांगू कुणाला?
मागतो तो, दान द्यावे याचकाला
भाकरीची याचना, सांगू कुणाला ?
सर्व लोकांना सुखी तू ठेव देवा
ही करीते प्रार्थना, सांगू कुणाला ?
उसळते तूफान देहातून माझ्या
या सुखी संवेदना, सांगू कुणाला ?