આશનું છેલ્લું કિરણ ડૂબી જશે
આશનું છેલ્લું કિરણ ડૂબી જશે
આશનું છેલ્લું કિરણ ડૂબી જશે,
સંતનું જયાં આચરણ ડૂબી જશે,
એક ખોટી લાલસાની હામમાં,
આદમીનું ભવતરણ ડૂબી જશે,
ફક્ત ટહુકે ઘરમાં જ્યારે દિકરી,
શોકનું વાતાવરણ ડૂબી જશે,
એ વિચારે ઈશ્વરે ટાળ્યો પ્રલય,
ક્યાંક બસ ચકલાંનું ચણ ડૂબી જશે,
પૂર છે શિક્ષણ નાં બસ વેપારનું,
આખરે આ બાળપણ ડૂબી જશે,
ઝાંઝવા જેવી રૂપાળી લાલસા,
મન સમું જેમાં હરણ ડૂબી જશે,
એ જ છે 'મહેબુબ' ની ઇચ્છા ફકત,
લઇને એ તારી શરણ ડૂબી જશે.