Library
ଯୁଗେ ଯୁଗେ ମହାପ୍ରଭୁ ତୁମେ ଭକତର
ଯୁଗେ ଯୁଗେ ମହାପ୍ରଭୁ ତୁମେ ଭକତର
ଯୁଗେ ଯୁଗେ ମହାପ୍ରଭୁ ତୁମେ ଭକତର ।
ତୁମେ ଦାସିଆର ପ୍ରଭୁ ତୁମେ ବନ୍ଧୁଆର ।୧।
ତୁମେ ମୃଗୁଣୀର ପ୍ରଭୁ ତୁମେ ବାରଣର ।
ତୁମେ ମହାପ୍ରଭୁ ସତ୍ଯେ ମତ୍ସ୍ଯ ଅବତାର ।୨।
ପ୍ରଳୟ ଜଳରୁ ବେଦ କରିଲ ଉଦ୍ଧାର ।
ଭକ୍ତ ସତ୍ଯବ୍ରତ ରାଜା ତୋଷିଲ ଅପାର ।୩।
କଚ୍ଛପ ରୂପ ଧରିଲ ଦେବଙ୍କ ହିତରେ ।
ସମୁଦ୍ର ମନ୍ଥନ ହେଲା ତୁମରି ପୃଷ୍ଠରେ ।୪।
ଅମୃତ ଦେଲ ଦେବଙ୍କୁ ବିଷ ପଞ୍ଚାନନ ।
ଯୁଗେ ଯୁଗେ ଭକତର ତୁମେ ଭଗବାନ ।୫।
ଶୂକର ରୂପେ ଦନ୍ତାଗ୍ରେ ଜଳରୁ ଧରଣୀ ।
ହିରଣ୍ୟାକ୍ଷ କବଳୁ ଆଣିଲ ଚକ୍ରପାଣି ।୪।
ଭକ୍ତ ପ୍ରହଲ୍ଲାଦ ପାଇଁ ସ୍ତମ୍ଭରୁ ବାହାର ।
ହୋଇ ମାରିଲ ହିରଣ୍ୟକଶିପୁ ଅସୁର ।୫।
ବାମନାବତାରେ ବଳି ଛଳିଲ ଆପଣ ।
ପଦୁଁ ଜାହ୍ନବୀ କରିଲେ ଧରଣୀ ପାବନ ।୬।
କ୍ଷତ୍ରିୟ ନିପାତ କଲ ଭୃଗୁରାମ ହୋଇ ।
ଜଗତ ପାପ ହରିଲ ରୁଧିର ବୁହାଇ ।୭।
ତ୍ରେତା ଯୁଗେ ବିନାଶିଲ ଲଙ୍କାର ରାବଣ।
ରାଜା କରାଇଲ ତହିଁ ଭକ୍ତ ବିଭୀଷଣ ।୮।
ଦ୍ବାପରେ ହୋଇଲ ବଳରାମ ଅବତାର ।
କୃଷ୍ଣ ସଙ୍ଗେ ଲୀଳାରତ ଗୋପ ମଥୁରାର ।୯।
ଭକ୍ତ ହିତେ ଅବତରି ବଉଦ୍ଧ ରୂପରେ ।
ନିବାରିଲ ପଶୁହତ୍ୟା ଏ ଧରାଧାମରେ ।୧୦।
କଳିରେ କଳକୀ ରୂପ ଧରି ଜଗନ୍ନାଥ ।
କରୁଅଛ ମାନବୀୟ ଲୀଳା ଅପ୍ରମିତ ।୧୧।
ତୁମେ ଭକତର ପ୍ରିୟ ଭକତ ତୁମର ।
ହସ୍ତ ପ୍ରସାରି ନଡିଆ ନେଲ ଦାସିଆର ।୧୨।
ବନ୍ଧୁମହାନ୍ତିର ଦୁଃଖ ଦୂର ତୁମେ କଲ ।
ବଳରାମ ଦାସ ବାଲିରଥେ ବିଜେ ହେଲ ।୧୩।
ସାଲବେଗ ପାଇଁ ରଥ ଅଟକ ରଖିଲ ।
ଚାରିଦିନ ଘୋର ଜଳ ବରଷା କରିଲ ।୧୪।
କାଞ୍ଚି ଅଭିଯାନେ ଭକ୍ତ ଗଜପତିଙ୍କର ।
ସହାୟତା କଲ ପ୍ରଭୁ ବ୍ରହ୍ମାଣ୍ଡ ଠାକୁର ।୧୫।
କେ ବର୍ଣ୍ଣିବ ମହାପ୍ରଭୁ ମହିମା ତୁମର ।
ଭକ୍ତ ହିତେ ଯୁଗେ ଯୁଗେ ତୁମେ ଅବତର ।୧୬।
ତୁମ ଶ୍ରୀପୟରେ ସଦା ରହୁ ମୋର ମନ ।
କରୁଣା କରିବ ପ୍ରଭୁ ପଙ୍କଜଲୋଚନ ।୧୭।
