ସଭିଏଁ ବଳି ଗଲେଣି
ସଭିଏଁ ବଳି ଗଲେଣି
ବାପା ମାଆ ଠାରୁ ବଳେଇ ଗଲେଣି
ପୁଅ ଝିଅ ଆଉ ଭେଣ୍ଡିଆ ନାତି
ଜନତାଙ୍କ ଠାରୁ ବୁକେଇ ଗଲେଣି
ଖଚ ମିଛ କୁହା ନେତା ଓ ନେତ୍ରୀ ।
ବକ୍ତା ଠାରୁ ଶ୍ରୋତା ବଳି ପଡିଲେଣି
ନାହିଁ ଶୁଣା ଆଉ ପୁରାଣ ପୋଥି
ସଭିଏଁ ସଭିଙ୍କି ଆଗୁଆ ହେଲେଣି
କିଏ ବା ଶୁଣୁଛି କାହାର ଉକ୍ତି ।
ବିପ୍ଳବ ର ଏଠି କଳନା ହୁଏନି
ସ୍ୱାଭିମାନୀ କହେ ଫୁଲାଇ ଛାତି
ଏଠି ସଭିଏଁ ତ ସବୁ ବୁଝିଲେଣି
କଳି ଗୋଳ ଆଉ ଅଯଥା ଯୁକ୍ତି ।
ଏଠି ଛଦ୍ମବେଶୀ ପୁରୋହିତ ଖୋଲି
ବଦଳାଇ ଦିଏ ପଇତା ନିତି
କେଇ ଖିଆ ସୂତା ପକାଇ କାନ୍ଧ ରେ
ବଳି ଦିଏ ନିଜ ସଂସ୍କାର ନୀତି ।
ଚାଷୀ ଠାରୁ ଚାଷ ବଳିପଡ଼ିଲାଣି
ନାହିଁ ଆମଦାନୀ ବିଶେଷ କିଛି
ଏଠି ବିଷ ଠାରୁ ବେଶୀ କୀଟାଣୁ ର ଭୟ
ହତାଶ ହେଲେଣି ଯେତେକ ଚାଷୀ ।
ଖାଦ୍ୟ ଠାରୁ ପୁଣି ଖାଦକ ର ଭୟ
ଖାଉଟି ହୁଅନ୍ତି ଭକୁଆ ଖାଲି
ମନରୁ ଭୁଲନ୍ତି ଭାଇଚାରା ଭାବ
ହିଂସା ରାହାଜାନି ଆସଇ ହଲି ।
ପବନଠୁଁ ବଳି ପ୍ରଗତି ବେଗ
ପ୍ରତାରଣା କହେ ଫୁଲାଇ ଛାତି
ମୁଁ ପରା ଏଠି ସାକ୍ଷାତ ଈଶ୍ୱର
ଆସି ମାରିଦେବା ମୋ ଆଦତି ।