Library
ପ୍ରିୟାର ଓଢଣୀ
ପ୍ରିୟାର ଓଢଣୀ
ପ୍ରିୟାର ଓଢଣୀ
ପ୍ରେମ ରଙ୍ଗ ବୁଣି
ମନ ରଙ୍ଗାଇ ଦେଲାଣି ।
ଶ୍ୟାମଳୀ ପ୍ରମାଳା
ପ୍ରେମ ସୁଧାବୋଳା
ମନକୁ ନେଉଛି ଟାଣି ।
ପ୍ରିୟାର ଓଢଣୀ
ହୃଦ ଦିଏ ହାଣି
ତୀକ୍ଷ୍ମ ଛୁରୀକା ସମ ।
ପ୍ରିୟାର ଅଧର
ପ୍ରେମେ ଜରଜର
ଦୃଶ୍ୟ ତା ଅନୁପମ ।
ପ୍ରିୟାର ଓଢଣୀ
ନିର୍ଝରା ଶ୍ରାବଣୀ
ନୀଳ ସାଗର ଲହରୀ
ପ୍ରୀତିପର୍ଣ୍ଣା ଧାର
ପ୍ରେମ ରାଗିଣୀର
ପ୍ରେମ ଧ୍ଵଜା ଫରଫର ।
ପ୍ରିୟାର ଓଢଣୀ
ମୋ ହୃଦ ତରଣୀ ।
ସ୍ୱଚ୍ଛ ପ୍ରୀତି ନିର୍ଝରିଣୀ
ଘୁଙ୍ଗୁର ଆବାଜେ
ମତୁଆଲୀ ସାଜେ
ମୁକୁଳା କବରୀ ବେଣୀ ।
ପ୍ରିୟାର ଓଢଣୀ
ଅଫେରା ଚାହାଣୀ
ଫଗୁଣର ରଙ୍ଗ ନେଇ ।
ମୋ ହୃଦ କେଦାରେ
ବସନ୍ତ ରାସରେ
ଚିତ୍ତ ମୋ ସିକ୍ତ କରଇ ।
ପ୍ରିୟାର ଓଢଣୀ
ପ୍ରେମରଙ୍ଗ ବୁଣି
ଉଚ୍ଚାଟ କରଇ ମନ ।
ତା ସ୍ନିଗ୍ଧ ପରଶ
ଆହା କି ସରସ
ଉଲ୍ଲଙ୍ଘ ନବଯୌବନ ।
ପ୍ରିୟାର ଓଢଣୀ
ଦେଖାଏ ତା ଠାଣି
ମଳୟ ମଦିର ବାସେ ।
ମୋ ମନମନ୍ଦିର
ପୁଲକ ବିଭୋର
ପ୍ରିୟାର ମିଳନ ଆଶେ ।
ପ୍ରିୟାର ଓଢଣୀ
ନାନ୍ଦନୀକ ବାଣୀ
କାନେ କହେ ଥିରି ଥିରି ।
ଗଭୀର ନିଶିଥେ
ଆସ ସ୍ୱପ୍ନ ପଥେ
ସୁରତିରେ ଦିଅ ଘାରି ।
ପ୍ରିୟାର ଓଢଣୀ
ପ୍ରମତ୍ତା ରମଣୀ
ଲୋଡ଼ୁଥାଏ ଆଲିଙ୍ଗନ ।
ପ୍ରେମ ପାଗଳିନୀ
ରସିକା କାମିନୀ
ପ୍ରୀତିରେ ହୋଇ ମଗନ ।
ପ୍ରିୟାର ଓଢଣୀ
ପାଵନୀ ତ୍ରିବେଣୀ
ଅମ୍ଲାନ ଶାଶ୍ଵତ ଧାରା ।
ନୟନକୁ ଭରେ
ଅପୂର୍ବ ଛନ୍ଦରେ
ଦିବ୍ୟ ପ୍ରେମ ସୁଧା ଭରା ।
