ଯୋଦ୍ଧା

ଆମେ ଚିକିତ୍ସକ ନବ କୋଭିଡର ଆଗ ଧାଡି       

ଯୋଦ୍ଧା ବୀର ସୈନିକ

ନିବାରିବୁ ଆମେ ରୋଗ ମହାମାରୀ ରହିଅଛୁ

ନିଜେ ସଦା ସତର୍କ ।

ଯାଉଅଛି ବ୍ୟାପି ରୋଗ ସଙ୍କ୍ରମଣ ସାରା

ଭୂମଣ୍ଡଳ ଏହି ବେମାରୀ

ଭୂତାଣୁ ତାହାର ବଦଳାଏ ରୂପ ନବ

ପ୍ରଜଜନେ ଘାତକ ଭାରି ।

ସାଧାରଣ ଥଣ୍ଡା ହୁଏ କାଶ ଜ୍ୱର ପୁଣି

ଘୋଳାବିନ୍ଧା ତଣ୍ଟିରେ ବ୍ୟଥା

ରୋଗ ଚିକିତ୍ସାରେ କଲେ ଅବହେଳା 

ହୁଏ ସଙ୍କ୍ରମିତ ଶ୍ୱାସ କଳିକା ।

ଅମ୍ଳଜାନ ଭାଗ କମିଯାଏ ଯେଣୁ

ରୋଗୀର ହୁଅଇ ଅକାଳ ମୃତ୍ୟୁ

ସାଙ୍ଘାତିକ ହୁଏ ଥିଲେ ବହୁମୂତ୍ର ବ୍ୟାଧି

ଜଟିଳତା କାରଣ ହେତୁ ।

ନାହିଁ ନିରାମୟ ନିର୍ଦ୍ଦିଷ୍ଟ ଔଷଧି

ଚାଲୁଅଛି ବିଶ୍ୱେ ଅନୁସନ୍ଧାନ

ତତ୍ପରତା ସହ କରାଯାଉଅଛି ନବ

ଉଦ୍ଭାବିତ ଟୀକାକରଣ ।

ଦୃତ ସଙ୍କ୍ରମଣ ରୋକାଯିବା ପାଇଁ ଲୋଡ଼ା         

ଭାଗିଦାରୀ ସଚେତନତା

ଭିଡ଼ ଗହଳିକୁ ନଯିବା ଉଚିତ

ଆଚରଣ ବିଧି ମାନି ଚଳିବା ।

ଘୋଡାଇ ରଖିବା ପାଟି ମୁହଁ ନାକ

ନିରାପଦ ଅଟେ ଗୃହେ ରହିବା

ଚାଲି ଚାଲି ଯାଇ ନିକଟ ବଜାରୁ

ଅତି ଆବଶ୍ୟକ ଦ୍ରବ୍ୟ କିଣିବା ।

ଦୂରତା ନିଶ୍ଚୟ ବଜାୟ ରଖିବା

ପରସ୍ପର ଠାରୁ ଆମେ ସମସ୍ତେ

ସଂସର୍ଗ କାରଣୁ ବ୍ୟାପୁଅଛି ବ୍ୟାଧି

ଏଣୁ ଏଡ଼ାଇବା ସ୍ପର୍ଶ ବିହିତେ ।

ସାବୁନ ଲଗାଇ ବାରମ୍ବାର ଆମେ

ହାତଧୋଇ ପରିଷ୍କାର ରଖିବା

ବାହାରୁ ଜିନିଷ ଘରକୁ ଆଣିଲେ

ପାଣି ବିଶୋଧକେ ଧୋଇ ରଖିବା ।

ଲୋଡୁଅଛୁ ଆମେ ଜନ ସହଯୋଗ

ପାଳିବା ଆଦର୍ଶ ବିଧି ନିର୍ଦ୍ଦେଶ

ନଚେତ୍ ଭୋଗିବ ସମାଜ ଦୁର୍ଦ୍ଦଶା

ଜିଣି ପାରିବନି ଯୁଦ୍ଧ ଭାରତ ।

ନିଜର ଜୀବନ ପରିବାର ସୁଖ

ଜଳାଞ୍ଜଳି ଦେଇ ରଣ ସମ୍ମୁଖେ

କରୁଛୁ ସଂଗ୍ରାମ ଭୁଲି ଦିନରାତି

ଜନହିତ ପାଇଁ ପାଳୁ କର୍ତ୍ତବ୍ୟେ ।

ସବୁ ସ୍ତରେ ହେଲେ ଉଦ୍ୟମ ସଫଳ

ରୋଗ ମହାମାରୀ ଦୂର ହୋଇବ

ମାନବତା ନିଶ୍ଚେ ଜିଣିବ ଯୁଦ୍ଧରେ

ମଣିଷ ମୁହଁରେ ହସ ଖେଳିବ ।