ଯାଚି ଧରାଇଲ ବଳେ

ପହିଲି ଦେଖାରେ ତୁମେ ଦେଇଥିଲ

ପାଦକୁ ନୂପୁର ହଳେ 

ନାଇଁ କରୁ କରୁ ଅନୁରୋଧ କରି

ଯାଚି ଧରାଇଲ ବଳେ ।

ତୁମ ଶାନ୍ତଶିଷ୍ଟ ମିଠା ବ୍ୟବହାର

ମୋ ମନକୁ ନେଲା ଟାଣି 

କେଉଁ ଛଟକରେ କେତେବେଳେ ସତେ

ପାରିଲିନି ଜମା ଜାଣି ।

ଧୀରେ ଧୀରେ ହେଲା ଭାବ ଦିଆନିଆ

ସଭିଙ୍କ ଅଜାଣତରେ 

ଧରାପଡ଼ି ହେଲେ କେତେ ହଟହଟା

ଭାବିଦେଲେ ଦେହ ଥରେ ।

ତୁମ ଆମ ଘରେ ହେଲା ମନାନ୍ତର

ମୁଁ ହୋଇଲି ଗୃହବନ୍ଦୀ 

ବନ୍ଧୁଙ୍କ ସାହାଯ୍ୟ ନେଇ ବୁଝୁଥିଲ

ମୋ ଖବର ଅନ୍ଦିସନ୍ଧି ।

ଶେଷରେ ସରଳା ପିଉସୀ କଥାରେ

ବୁଝିଲେ ମୋ ବାପା ମାଆ 

ତୁମରି ଘରକୁ ପ୍ରସ୍ତାବଟି ଦେଲେ

କରିବାକୁ ଆମ ବାହା ।

ତୁମ ପରିବାର ରାଜି ବି ହୋଇଲେ

ଜାତିପ୍ରଥା ହେଲା ତୁଚ୍ଛ 

ନିର୍ବନ୍ଧ ପଡ଼ିଲା ପାଠ ପଢ଼ା ପରେ

ନାଇବି ସିନ୍ଦୂର କାଚ ।

ବରବେଶ ସାଜି ତୁମେ ଆସି ମୋତେ

ନେଇଯିବ ହାତଧରି 

ସଭିଙ୍କର ସେଠି ଆଦର ପାଇବି

ବୋହୁର କର୍ତ୍ତବ୍ୟ କରି