Library
Profile
ଉଜ୍ଜ୍ବଳ ଜ୍ୟୋତିଷ୍କ ବାଜପେୟୀ
ଉଜ୍ଜ୍ବଳ ଜ୍ୟୋତିଷ୍କ ବାଜପେୟୀ
ଭାରତ ଭୂଇଁରେ ଜନମି ଅଛନ୍ତି
ଯେତେ ଉଜ୍ଜ୍ବଳ ଜ୍ୟୋତିଷ୍କ
ସେମାନଙ୍କ ମଧ୍ୟେ ତୁମେ ହେ ଅଟଳ
ଜାଳିଛ କୀର୍ତ୍ତି ଆଲୋକ
ସେହି ଚିର ଅମଳିନ
ସ୍ମୃତିଗାଥାସବୁ ଝୁରି ଚାଲିଥିବ
ଏଠାରେ ପ୍ରତିଟି ପ୍ରାଣ ।
ଉଣେଇଶ ଶହ ଚବିଶ ମସିହା
ଡିସେମ୍ବର ପଚିଶରେ
ମଧ୍ୟପ୍ରଦେଶର ଗ୍ବାଲିଅରଠାରେ
କୃଷ୍ଣ କୃଷ୍ଣାଙ୍କ କୋଳରେ
ଭୂମିଷ୍ଠ ଶୁଭ ବେଳାରେ
ମହକି ଉଠିଲ ମେଲି ଦୁଇ ପତ୍ର
ତୁଳସୀ ସମ ବାସରେ ।
ଛାତ୍ର ଜୀବନରୁ ସେବା ମନୋବୃତ୍ତି
ଦେଶପ୍ରେମୀ ମନୋବୃତ୍ତି,
ଭୀଷ୍ମ ସଦୃଶ କାର୍ଯ୍ୟରେ ଅଟଳ
ହୃଦୟରେ ଶାନ୍ତି ମୈତ୍ରୀ
ଭାବକୁ ରଖି ସାଇତି
ସମର୍ପଣ ତ୍ୟାଗ କର୍ତ୍ତବ୍ୟବୋଧର
ମଣ୍ଡନେ ରଚିଲ ଖ୍ୟାତି ।
ଜୀବନ ଯୌବନ କରି ସମର୍ପଣ
ଭାରତବାସୀଙ୍କ ପାଇଁ
ସତ୍ୟର ପୂଜାରୀ ହେ ନିର୍ଭୀକ ଯୋଗୀ
ନୀତି ଆଦର୍ଶ କୋଳେଇ
ଅଖଣ୍ଡ ଭାରତ ସ୍ବପ୍ନ
ନେତୃତ୍ବ ବଳରେ ସାଜି ରାଜନେତା
ପୂରଣେ ରଖିଲ ଧ୍ୟାନ ।
ବରପୁତ୍ର ତୁମେ ଭାରତ ମାଟିର
ଜନସଙ୍ଘ ସଂସ୍ଥାପକ
କବି ପତ୍ରକାର ଅର୍ଜୁନ ପତ୍ରିକା
ପଞ୍ଚଜନ୍ୟ ସମ୍ପାଦକ
ଜଣେ ବି ବାଗ୍ମୀ ପ୍ରବକ୍ତା
ତ୍ରିବାର ପ୍ରଧାନମନ୍ତ୍ରୀ ପଦ ମଣ୍ଡି
ଜଣେ ବିଜ୍ଞ ରାଜନେତା ।
କାର୍ଗିଲ ଯୁଦ୍ଧରେ ଶତ୍ରୁ ପାକିସ୍ତାନ
ମଥାନତ ତୁମ ପାଇଁ
ପୋଖରାନ ପରମାଣୁ ପରୀକ୍ଷାରେ
ଶତ୍ରୁଙ୍କୁ ଦେଲ ଡରାଇ
ହେ ଯୋଗଜନ୍ମା ପୁରୁଷ
ବିଜ୍ଞାନ କ୍ଷେତ୍ରରେ ବଢ଼ାଇ ଗୁରୁତ୍ବ
ବୋଳିଦେଲ ମୁଖେ ହସ ।
ପ୍ରଧାନମନ୍ତ୍ରୀ ସଡ଼କ ଯୋଜନା
ପୁଣି ସ୍ବର୍ଣ୍ଣ ଚତୁର୍ଭୁଜ,
ଆଜି ଅଙ୍ଗେଅଙ୍ଗେ ଅନୁଭବ କରୁ
କେତେ ଥିଲା ତୁମ ତେଜ
ଭାରତ ଜନତା ପାର୍ଟି
ରାଜନୀତି ଦଳ ଗଢ଼ି ଜନତାଙ୍କ
ହୃଦୟ କଲ ଏକାଠି ।
ନିର୍ମାଣ ସଡ଼କ ପଥ ଲାହୋରକୁ
କହେ କୃତିତ୍ବର ଗାଥା
ବୁଝାମଣା ତୁମ ଶତ୍ରୁକୁ ବି ମିତ୍ର
ଗଢ଼ିବାରେ ସାମରଥା
ହେ କରିତ୍କର୍ମା ବୀର
ସତ୍ୟନିଷ୍ଠ ତୁମ ଜୀବନ ଶଇଳୀ
ବଚନ ବଜ୍ର ଗମ୍ଭୀର ।
ଦେଶ ହିତ ପାଇଁ ନିଜକୁ ସମର୍ପି
ଥିଲ ମନ୍ତ୍ରୀ ବୈଦେଶିକ
ହିନ୍ଦୀରେ ଭାଷଣ ଜାତିସଂଘରେ
ରଖିଲା ଭାରତ ଟେକ
ନିଃସ୍ବାର୍ଥପର ଜୀବନ
ଜ୍ୟୋତିଷ୍ମାନ ସମ ବିତରି ଆଲୋକ
କର୍ମେ ତୁମେ ଭଗବାନ ।
ଉଣେଇଶ ଶହ ଚଉରାନବେରେ
ଶ୍ରେଷ୍ଠ ସାଂସଦ ସମ୍ମାନ
ଦୁଇ ହଜାର ପନ୍ଦର ମସିହାରେ
ଭୂଷିତ ଭାରତରତ୍ନ
କବିତା ଯେ ଏକାବନ
ପଦ୍ମବିଭୂଷଣ ପଦବୀକୁ ଲଭି
ସାରା ଦେଶେ ସନମାନ ।
ଛାଡ଼ିଗଲ ଧରା ଅଗଷ୍ଟ ଷୋହଳ
ଦୁଇ ହଜାର ଅଠର
କର୍ତ୍ତବ୍ୟ ପାଳନେ ଭୀଷ୍ମ ସମ ତୁମ
ପ୍ରତିଜ୍ଞା ଥିଲା ଅଟଳ
ଭୀଷ୍ମ ଆଖ୍ୟା ସେଥିପାଇଁ
ଯୁଗପୁରରୁଷରେ ନାମକୁ ଲେଖାଇ
ଜୀବିତ ଭାରତ ଭୂଇଁ ।
ଶୁଭ ଜନ୍ମଦିନେ କରି ପ୍ରଣିପାତ
ମାଗୁଅଛୁ ଶୁଭାଶିଷ
ଏ ଧରା ବକ୍ଷରେ ତୁମ ପରି କେହି
ଯେବେ ହୁଅନ୍ତେ ପ୍ରକାଶ
ବଢ଼ନ୍ତା ମନେ ସାହସ
ନବ ରୂପେ ସତେ ତୁମ ଆଗମନ
ବାଢ଼ି ଦିଅନ୍ତା ପୀୟୂଷ ।।
