ତୁମକୁ ଦେଖିଲା ପରେ
ତୁମକୁ ଦେଖିଲା ପରେ
ସାଗର କୂଳରେ ଖୋଜିଲି ଶାମୁକା
ପାଇଲି ଗୋଟିଏ ମନ
ହୃଦୟେ ଜାଗିଲା ପହିଲି ପ୍ରେମର
ମିଠା ମିଠା ଶିହରଣ I
ବାଟ ହୁଡିଥିବା ଅଲୋଡା ମନରେ
ଅମୃତ ବରଷି ଗଲା
ତୁମପାଇଁ ସଖୀ ଅନେକ ସପନ
ଆଖିତଳେ ବସା କଲା I
ଆକାଶଟା ସାରା ଅନେକ ବାଦଲ
ବୁଲୁଥିଲେ ଭାସି ଭାସି
ତୁମେ ଏକା ସଖୀ ଏମିତି ବାଦଲ
ଖୁସି ମନେ ଗଲ ବର୍ଷି I
ଦୁଃଖର ପାହାଡ ମାଟିରେ ମିଶିଲା
ତୁମକୁ ଦେଖିଲା ପରେ
ଲାଗୁଥିଲା ଅବା କେଉଁ କାଳୁ ତୁମେ
ଥିଲ ମୋର ମନ ତଳେ I
ଫଗୁଣର ଫଗୁ ବୋଳିଦେଲ ଦେହେ
ମନକୁ ରଙ୍ଗୀନ କଲ
ଦୁନିଆ ଲାଗିଲା ନୂଆ ନୂଆ ଯେବେ
ତୁମ ପ୍ରେମେ ଭିଜାଇଲ I
ଆଖିତଳେ କେତେ ସପନ ଖଞ୍ଜିଲ
ଆଖିରେ ମିଶାଇ ଆଖି
ହୃଦୟରେ ମୋର ରହିଗଲ ତୁମେ
ହୋଇ ମୋର ପ୍ରିୟ ସଖୀ I