ଭୁଲ ଠିକଣା

ଠିକଣା ତୁମର ବଦଳି ଗଲାଣି ଅଚିହ୍ନା ଲାଗୁଛି ଏବେ,

ଭୁଲି ଯାଇଥିବ ଅଭୁଲା ଦିନକୁ ପ୍ରିୟା ଡାକୁଥିଲା କେବେ । (ଘୋଷା)

ଦିନଥିଲା ତୁମେ ମୋ ଚଲାପଥକୁ ରହୁଥିଲ ଚାହିଁଚାହିଁ,

କେତେ ଶୀତରାତି ଯାଉଥିଲା ବିତି ଖରା ବରଷାକୁ ସହି ।

ସେଦିନ କାହାଣୀ ଥିଲା କି ଛଳନା ଆଜି ସେହିକଥା ଭାବେ ।

ଠିକଣା ତୁମର ବଦଳି ଗଲାଣି ଅଚିହ୍ନା ଲାଗୁଛି ଏବେ,

ଭୁଲି ଯାଇଥିବ ଅଭୁଲା ଦିନକୁ ପ୍ରିୟା ଡାକୁଥିଲା କେବେ । (1)

କହୁଥିଲ ତୁମେ ମୋ ବିନା ଜୀବନ ସତେ ତୁଚ୍ଛ ମରୁବାଲି,

ମୋ ଭାଷାରେ ଭରି ରହିଛି ପୀୟୂଷ ଚାହିଁଛି ପିଇବି ବୋଲି ।

କହିବ କି ଆଉ କା'ରୂପ ନିଆଁରେ ଝାସ ଦେଇଅଛ ଏବେ ।

ଠିକଣା ତୁମର ବଦଳି ଗଲାଣି ଅଚିହ୍ନା ଲାଗୁଛି ଏବେ,

ଭୁଲି ଯାଇଥିବ ଅଭୁଲା ଦିନକୁ ପ୍ରିୟା ଡାକୁଥିଲା କେବେ ।(2)