ଚିଠି

ଆରେ ମୋର ଧନ ଦେଖେ ମୁଁ ସପନ

ଦେଶ ପ୍ରାନ୍ତେ ଚାଲେ ରଣ

ସେଥିପାଇଁ ଆଜି ଏହି ପତ୍ର ଲେଖେ

ବୁଝିବୁ ମାଆର ମନ ।

ଏ ମାଟିର ତୁହି ବୀର ସୁସନ୍ତାନ

ଦେଶ ରକ୍ଷା ଭାର ହାତେ

ପାଳନ କରିବୁ କର୍ତ୍ତବ୍ୟ ତୋହର

ଦିନ ହେଉ କିବା ରାତେ ।

କୋଟି କୋଟି ଜନ ନିଶ୍ଚିନ୍ତ ମନରେ

ନିଦ୍ରା ଯାନ୍ତି ରାତ୍ରୀ କୋଳେ

ଏକା ମା' ତୋର ପଥ ଚାହିଁ ଅଛି

ଜଳି ଜଳି ଚିନ୍ତାନଳେ ।

ଭୀରୁ ହୋଇ କେବେ ପଛ ଘୁଂଚା ଦେଇ

ଫେରିବୁନି ମୋର ପାଶେ 

ହୃଦୟେ ରଖିବୁ ତୁହି ଭାରତୀୟ

ତା ପାଣି ପବନ ଶ୍ଵାସେ ।

ଗର୍ବ ହାର ପିନ୍ଧେ ମୁଁ ଯେ ବୀରମାତା

ତୁହି ମୋ ଅମର ପୁତ୍ର

ତୋ କୀର୍ତ୍ତିରେ ମୁହିଁ ସରଗ ଯିବିରେ

ତୁହି ମୋର ପୁଣ୍ୟ ପାତ୍ର ।

ଚିଠିର ମହତ୍ତ୍ଵ ବୁଝିବୁ ବାବୁରେ

ଆଜି ନାହିଁ ତା'ର ମୂଲ୍ୟ

ବିଜୟ ଉଲ୍ଲାସ ପାଳିବା ବାବୁରେ

ସକଳ ରହନ୍ତୁ ଭଲ ।