କବିତା ପର୍ବ : ଗୀତି କବିତା-28 : ମରୁଭୂମି

ମରୁଭୂମି ବାଲିଘରେ ଛଳନାରେ ଜିଇଁଥିଲେ -

ସହିବାକୁ ପଡ଼େ ତାକୁ ଖାଲି ଯାତନା,

ମମତାର ମୂଲନାହିଁ, ସ୍ନେହ-ପ୍ରୀତି କାମନାହିଁ-

ମିଳେ ପ୍ରତାରଣା ନାହିଁ ପ୍ରେରଣା | (ଘୋଷା)

ଜାଣି ହେବ ସେ ଅଜଣା, ମାଟିରେ ଗଢ଼ା ଖେଳନା,

ଯିଏ ଚାହିଁବ ଖେଳିବ, ଖେଳିସାରି ଭାଙ୍ଗିଦେବ,

କାମଚଳା ମନନେଇ ନିଜର ଶବକୁ ବୋହି -

ଯେତେ ଚାଲିଲେ ବି ବାଟ ସରେନା,

ସହିବାକୁ ପଡ଼େ ତାକୁ ଖାଲି ଯାତନା | (1)

କହିଲେ ଦୁଃଖ ବଢିବ, ନ କହିଲେ ସଢୁଥିବି,

ଶୁଣିବା ଲୋକେ ହସିବେ, ଆହୁରି ସୁଯୋଗ ନେବେ,

ପର ପାଇଁ ଖଟି ଖଟି ମିଶିଯିବ ପେଟ ପିଠି-

ଜାତି ଚାଲିଯିବ ପେଟ ପୂରେନା,

ସହିବାକୁ ପଡ଼େ ତାକୁ ଖାଲି ଯାତନା l (2)