ତୁମ ନୀରବତା

ନୀରବତା ତୁମ ବେଶି କଷ୍ଟ ଦିଏ

ହୃଦୟ ପାରେନା ସହି

ତୁମେ ହସି କରି ଚାହିଁଦେଲେ ଥରେ

ଯାଏ ପ୍ରେମ ନଈ ବହି 

ନୀରବତା ଯେବେ ଦେଖେ ତୁମ ମୁହେଁ

ପ୍ରଶ୍ନର ପାହାଡ଼ ଆସେ

କେତେ ଯେ ଭାବନା କେତେ ପୁଣି ଚିନ୍ତା

ମନ ଭିତରେ ମୋ ଭାସେ 

ଭାବୁଥାଏ ମନ କାହିଁ ତୁମ ଓଠ

ନିରବ ଆଜି ହୋଇଛି

କେଉଁ କଥା ମୋର ହୃଦୟକୁ ତୁମ

ଏତେ କଷ୍ଟ ଦେଇଅଛି 

ସବୁ ସହିପାରେ ସହି ପାରେ ନାହିଁ

ତୁମର ଏ ନୀରବତା

ତୁମ ହସ ଟିକେ ନ ଦେଖିଲେ ମନ

ହୃଦୟକୁ ହୁଏ ଚିନ୍ତା 

କେଉଁ କଥା ମୋର ପ୍ରିୟାକୁ ମୋହର

ନିରବ ତ କରିଅଛି

କଥାକୁହା ମୋର ଅଳସୀ ପ୍ରିୟାକୁ

ଦୁଃଖରେ ଭରି ଦେଇଛି

ଟାଣିଦିଏ ମନେ ଆଶଙ୍କାର ଡୋର

ଦେଖି ପ୍ରିୟା ନୀରବତା

ହସେଇବା ପାଇଁ ପ୍ରିୟାକୁ ମୋହର

କରୁଥାଏ କେତେ ଚିନ୍ତା 

ସଜ ଫୁଟା ମୋର ଗୋଲାପର ଫୁଲ

କାହିଁ ମୁହଁ ଫୁଲାଇଛି

ନିରବ ଯେ ହୋଇ ମନକୁ ମୋହର

କଷ୍ଟ ଏତେ ଦେଉଅଛି 

ଚାନ୍ଦ ମୁହେଁ ଆଜି ମେଘ ଆସି କରି

ଲୁଚେଇ ଯେ ଦେଇଅଛି

ତାର ହସ ଭରା ଜୋଛନାକୁ ଆଜି

ଲୁଚେଇ କାହିଁ ରଖିଛି 

ଯେତେ ଡାକିଲେ ବି ଶୁଣୁନାହିଁ ପ୍ରିୟା

ମନ ମାରି ବସିଅଛି

ଅଭିମାନି ମୋର କେଉଁ କଥା ପାଇଁ

ଅଭିମାନ କରିଅଛି 

ସତେ ପ୍ରିୟା ତୁମ ସେ ଲାଜୁଆ ହସ

କେତେ ଖୁସି ମତେଦିଏ

ନୀରବତା ଯେବେ ତୁମକୁ ଯେ ଛୁଏଁ 

ମନ ମୋର କାନ୍ଦୁଥାଏ 

ହସିଦିଅ ମୋର ଲାଜୁକୁଳୀ ଲତା

ନୀରବତା ଭାଙ୍ଗିଦିଅ

ନୀରବତା ଭାଙ୍ଗି ହୃଦୟରେ ତୁମ

ପ୍ରେମ ହସ ଭରିଦିଅ