ସଂପର୍କର ଚିହ୍ନା ସମୟ

ସମୟର ଏକ ଚିହ୍ନା ବେଳାରେ

ଏମିତି କେମିତି ଯେ ଅଚିହ୍ନା ହେଲ

ଆମେ ଭସେଇଥିବା କାଗଜଡଙ୍ଗା 

ଲବଙ୍ଗଦ୍ବୀପ ନଛୁଉଁଣୁ 

କେଉଁ ଅଜଣା ଦ୍ବୀପରେ ଅଟକି 

ଲବଙ୍ଗ ବେପାର କଲ

ଗୀତର ଲହରରେ ସଂପର୍କର ଇନ୍ଦ୍ରଧନୁ

ଏଯାଏ ଦୋଳି ଖେଳୁଛି ମୋ ଭିତରେ

ତମେ କେମିତି ଯେ ସୁରରୁ ଛିଟିକି

ଜୀବନର ଗଣିତ ଖାତାରେ ଆଉ କାହା 

ଅଟୋଗ୍ରାଫ୍ ସାଥେ ସେଲ୍ଫିରେ ସେଲ୍ଫି ରେ 

ବାଟ ଭାଙ୍ଗିଗଲ !

ଏମିତି ବି ଅଚିହ୍ନା ହୋଇପାରେ 

ସଂପର୍କର କୁଆଁପତ୍ର,

ମିଛ ହୋଇଯାଏ 

ଶ୍ରାବଣ ସଂଜର ନିଛାଟିଆ ଓଳିତଳ, 

ଲୁଚକାଳିର ରୋମାଞ୍ଚ,ରାତିରାତି ଗପ, 

ସୋରିସୋରି ସ୍ବପ୍ନ,ମିଛ ବି ହୋଇଯାଏ ‐

ସଂପର୍କର ସୁଲୁସୁଲୁ ମଳୟ ପବନ !

ସମୟର ଏକ ଚିହ୍ନା ବେଳାରେ

ଏବେ କାହିଁକି

ଅତୀତର ଚିହ୍ନାମୁହଁ 

ଦୋ' ଦୋ' ଚିହ୍ନା...ନିହାତି ଅଚିହ୍ନା,

ସଂପର୍କର ଜହ୍ନ ହସିଲେ ବି

ସ୍ମୃତିର ଜହ୍ନିଲଟାରେ ଅସରନ୍ତି ଛଳନା !

ସମୟର ଏ କେମିତି ଯେ ଏକ ଚିହ୍ନାବେଳ !

ସ୍ମୃତିର ସୂତାରେ ଗୁନ୍ଥା 

ସଂପର୍କର ମୋତିମାଳ...ଡହଳ ବିକଳ ! !