ପ୍ରେମପତ୍ର

ପ୍ରେମ ସୁରଭିରେ ରଞ୍ଜିତ ଚିଠି 

ଯୋଜନ ଯୋଜନ ଅତିକ୍ରମ କରି 

ମଧୁର ମଧୁର ବାସେ 

ଯେତେ ଗୁପ୍ତଧନ କରି ରଖିଲେ ବି

ନିନ୍ଦା ଅପବାଦ ଚଉଦିଗ ଚହଟି 

ଲୋକମୁଖରେ ଭାସେ ।

ପାରା ହାତେ ଦେଇ 

ପ୍ରେମ ପତ୍ର ବାଢ଼ି 

ରୂପସୀ ରାଜକୁମାରୀ ଏକା 

ଅଭିସାରିକା ସେ ଚଞ୍ଚଳମତି 

 ପ୍ରିୟ ରାଜକୁମାର ସହ 

ଗୁପ୍ତସ୍ଥାନେ କରେ ଦେଖା ।

ଡାକବାଲାର ଆସିବା ବାଟକୁ 

ସତୃଷ୍ଣେ ଅନାଇ ଗ୍ରାମର ତରୁଣୀ 

ବାଟରୁ ହିଁ ମାଗିନିଏ 

ତାର ପ୍ରିୟତମ ଦେଇଥିବା ପତ୍ର

ଗୋପନେ ପଢି ବସି ନିରୋଳାରେ

ପତ୍ରକୁ ଅୟୁତ ଚୁମ୍ବନ ଦିଏ ।

ବିରହି ଘରଣୀ ଛଟପଟ ହୋଇ

ପ୍ରିୟ ଲେଖା ପତ୍ରକୁ ଅପେକ୍ଷି 

ଅନିଦ୍ରାରେ ରାତି ଦିନ ଗଣୁଥାଏ 

ଦାଦନ ଶ୍ରମିକ ହୋଇ ଯାଇଥିବା

ଜୀବନ ସାଥୀ ପତ୍ରକୁ, ତାହାର 

ପ୍ରାଣ ଠାରୁ ପ୍ରିୟ ମଣୁଥାଏ ।