ସ୍ୱପ୍ନର ନାୟିକା ତୁମେ

ପୂର୍ଣ୍ଣମୀ ଚନ୍ଦ୍ରମା ତୁମେ 
ତୁମ ଶୁଭ୍ରକାନ୍ତିମୟ ଜ୍ୟୋତ୍ସ୍ନାରେ,
ଇଚ୍ଛା ମୋର ପ୍ରବଳ ,
ହେବାକୁ ପ୍ଳାବିତ ।

କସ୍ତୁରୀ ତୁମେ 
ତୁମ ଦିବ୍ୟ ମନମୋହକ ବାସ୍ନାରେ ,
ମୋ ତନୁ ହେବଯେବେ ଅନ୍ତରଙ୍ଗେ ଲେପିତ 
ମୁଁ ହେବି ଶ୍ରୀଚନ୍ଦନ ଚର୍ଚ୍ଚିତ।

ବସନ୍ତ ମଳୟ ତୁମେ 
ଅନୁଲିପ୍ତ ହୋଇ ସେଇ ଶୀତଳ ସମୀରେ 
ହସର କୁହୁକେ ତୁମ କୋଇଲି ରାଗିଣୀ 
ଶୁଣୁଥିବି ଅବିରତ ।

ସ୍ୱପ୍ନର ନାୟିକା ତୁମେ 
ରୂପସୀ ଜହ୍ନ ପରି କର ଯେ ଇସାରା 
ପ୍ରେମ ଅନୁରାଗେ ହୁଅଇ ଜାଗ୍ରତ 
ମୋର କଳ୍ପନା ଜଗତ ।