ତୁମ ଓ ମୋ ଭିତରେ ..

ତୁମ ଓ ମୋ ଭିତରେ ଦୂରତା କେତେ? 
ଏଇ  ଜହ୍ନ ଓ କଇଁର ଦୂରତା ଯେତେ ,
ଯୋଜନ ଯୋଜନ ।

ତୁମ ଓ ମୋ ଭିତରେ ନିକଟତା କେତେ?
ଏଇ ସୂର୍ଯ୍ୟ ଓ ପଦ୍ମର ନିକଟତା ଯେତେ ,
ସୌର କିରଣ ମାତ୍ର କେଇ ନିମିଷରେ 
ଛୁଇଁଯାଏ ପଙ୍କଜିନୀ ସର୍ବାଙ୍ଗ 
ଦେଇ ପୀରତି ଚୁମ୍ବନ 
ସୂରୁଜ ଉଇଁବା ମାତ୍ରେ ।

ତୁମ ଓ ମୋ ଅନ୍ତର ଘନିଷ୍ଠତା କେତେ? 
ଏହା ପାଇଁ ନା ଶବ୍ଦ ଅଛି ନା ଉପମା ,
ବିରହୀ କଇଁ କି ବିରହୀ ପଙ୍କଜିନୀ 
କରିବେ ତାର ସଠିକ୍ କଳନା ।
ଏଇ ଭାବର ରସରେ 
ଚେତନା ଭିଜିଛି 
ଚେତନା ସର୍ବଦା ଅନ୍ତରେ ରସିଛି ।
ନାହିଁ ତ ଏମିତି ମୁହୂର୍ତ୍ତ ଟିଏ 
ଯହିଁ ଫୁଟିନାହିଁ ସ୍ମୃତିସରୋବାରେ 
ଶ୍ୱେତକଇଁ, ନୀଳପଦ୍ମ।
ତେବେ କୁହ 
ଏଇ ଭାବ ସରୋବର ର
ଗଭୀରତା କେତେ?
ତୁମ ଓ ମୋ ଅନ୍ତର ଘନିଷ୍ଠତା କେତେ ?