କଳାମେଘୀ ପାଟ ପିନ୍ଧି ମେଘଟେ ହୋଇ

କଳାମେଘୀ ପାଟ ପିନ୍ଧି ମେଘଟେ ହୋଇ

ବରଷିଯା' ପ୍ରିୟା ମୋର ଭିଜେଇ ଦେଇ

...........କଳାମେଘୀ ପାଟ ପିନ୍ଧି 

             ମେଘଟେ ହୋଇ ! ୦ !

ନାଚୁଥିବି ମୟୂର ମୁଁ ଚନ୍ଦ୍ରିକା ତୋଳି

ସାରା ଖୁସି ଉଡୁଥିବି ସରାଗ ଦୋଳି

କୁଳୁ କୁଳୁ ବୋହୁଥିବ ଆଶାର ନଈ

...........କଳାମେଘୀ ପାଟ ପିନ୍ଧି 

             ମେଘଟେ ହୋଇ ! ୧ !

ମନବେଙ୍ଗ ରଟୁଥିବ ଜୀବନ ଗୀତ

ଫିକା ଫିକା ଆଲୁଅରେ ଅଳପ ଶୀତ

ଅଳସ ଆଖିକୁ ନିଦ ଆସିବ ଛାଇ

...........କଳାମେଘୀ ପାଟ ପିନ୍ଧି 

             ମେଘଟେ ହୋଇ ! ୨ !

ସପନର ଇନ୍ଦ୍ରଧନୁ ଦିଶିବ ପରୀ

ଲାଜ ଲାଜ ଓଠ ହସେ ମାନିବ ଭାରି

ସପନଟା ଭାଙ୍ଗି କାଳେ ଉଠିବି ଚେଇଁ

...........କଳାମେଘୀ ପାଟ ପିନ୍ଧି 

             ମେଘଟେ ହୋଇ ! ୩ !