ତୁମ ହାତଲଖା ଚିଠି

ତୁମ ହାତଲେଖା ଚିଠି .....

ଆସିଥିଲା ଯେବେ ମୋ ଠିକଣାରେ 

ପ୍ରେମ ନିବେଦନ ରଖି 

ସ୍ୱର୍ଗୀୟ ଆନନ୍ଦ ପରିଭାଷା ମୋତେ

ବୁଝିବା ନ ଥିଲା ବାକି ।

ତୁମ ହାତଲେଖା ଚିଠି ...

ପକେଟ୍ ରେ ଲୁଚାଇ ବୁଲୁଥିଲା ବେଳେ

ପାଖେଥିଲା ଲୋକ ପଚାରୁଥିଲେ 

କି ଅତର ମାଖିଛ ବୋଲି ।

ମଲ୍ଲି ନା ଗୋଲାପ ,ଜୁଇ ନା ହେନା 

ଅବା ରଜନୀଗନ୍ଧା କି ଝରା ଶେଫାଳି 

କି ବାସ୍ନା ଦେଇଛ ବୋଳି ?

ତୁମ ହାତଲେଖା ଚିଠି .....

ପ୍ରାଣ ଠାରୁ ପ୍ରିୟ ଅମୂଲ୍ୟ ବିଭୂତି 

ସୁଖ ସପନର ସଜ ଅନୁଭୂତି 

ବକ୍ଷେ ଧରିଥିଲେ ଚାପି 

ପାହିଯାଏ ଶୀତ ରାତି 

ବିରହ ଜ୍ଵାଳା ରେ ଚନ୍ଦନ ପ୍ରଲେପି

ଦିଏ ମଧୁରାତି ଅନୁଭୂତି ।

ତୁମ ହାତଲେଖା ଚିଠି ....

ମନ ମାନସୀର ଉଦାର ପ୍ରତିମା 

ପ୍ରୀତି ଚୁମ୍ବନକୁ ନ କରେ ମନା 

ଅସୀମ ଧୈର୍ଯ୍ୟବତୀ ସେ ଚିଠି 

ସଖୀ ଉତ୍ତମା 

ପ୍ରାଣ ପ୍ରିୟତମା ।