ତୁମ ହାତଲେଖା ଚିଠି

ତୁମ ହାତଲେଖା ଚିଠି ପଢ଼ି ମୁଁ ଯେ

ରଖେ ଗୋ ତାକୁ ସାଇତି

ସମୟ ସ୍ରୋତରେ ସେଇ ଚିଠି ସାଜେ

ଅଭୁଲା  ପ୍ରେମର  ସ୍ମୃତି 

ଲିଭିଯାଏ  ସିନା  ଚିଠିର  ଅକ୍ଷର

ଭାଷା ଲାଗୁଥାଏ ନୂଆଁ

ଉଜ୍ଜୀବିତ କରେ ଯୌବନକୁ ମୋର

ଚିଠିରେ ଓଠର ଛୁଆଁ 

ଗୋଲାପି ଲଫାପା ତା ଭିତରେ ଚିଠି

ମହକେ ବାସ୍ନା ଅତର

ଭଲଲାଗେ ବେଶି ଲେଖିଥାଅ ଯେବେ

ଦେବାକୁ ଚିଠି ଉତ୍ତର 

ଚିଠିକୁ ମୁଁ ସାଥି ନିରୋଳାରେ ବସି

ପଢେ ଯେ ଅନେକ ଥର

ଲୁହ ଦେଇଯାଏ ଲେଖା ହୋଇଥିବା

ଶେଷରେ "ଇତି ତୁମର" 

ଚିଠିର  ଇତିରେ  ସରିଯାଏ  ସିନା

ତୁମ ସେ ପ୍ରେମର ଲେଖା

ଆଉ ଏକ  ଚିଠି  ପାଇବାକୁ  ସଖି

କରେ ମୁଁ କେତେ ଅପେକ୍ଷା