ପ୍ରେମର ଭୂଗୋଳ

ଅକ୍ଷାଂଶ ଦ୍ରାଘିମା ସବୁ ତୁମେ ମୋର

ଭୂ ଗୋଲକ ମୁଁ ତୁମର

ଭାଙ୍ଗି  ପାରିବନି  ସମ୍ପର୍କକୁ ଆମ

ନକ୍ଷତ୍ର  ମହାକାଶର

ତୁମେ ଥିଲ ଦିନେ ଉତ୍ତର ମେରୁ ଗୋ

ମୁଁ ମେରୁଟେ ଦକ୍ଷିଣ

ପ୍ରେମଅକ୍ଷ ଆସି ସଂଯୋଗ କରିଲା

ହୋଇଲା ଆମ ମିଳନ

ହୃଦୟ ମାନଚିତ୍ରରେ  ଅଟ  ତୁମେ

ଦୂରତା ଦିଗ ସଂକେତ

ତୁମେ ଅଟ ପୁଣି ବାୟୁ ଆଉ ଅଗ୍ନି

ଐଶାନ୍ୟ ସାଥେ ନୈଋତ

ଆବର୍ତ୍ତନ  ଆମ  ସୃଷ୍ଟି  କରୁଥିବ

ପ୍ରେମର ଦିବସ ନିଶି

ଆମ  ମିଳନରେ  ହସି  ଉଠୁଥିବ

ତାରା ସୂର୍ଯ୍ୟ ସହ ଶଶୀ

ଆଲୋକବର୍ଷର  ଦୂରତାରେ ଯାଇ

ଗଢ଼ିବା ପ୍ରେମର ପିଣ୍ଡ

ଖୋଜୁଥିବେ ଯେ ଉଲକା ଉପଗ୍ରହ

ଖୋଜିବ ବିଶ୍ୱ ବ୍ରହ୍ମାଣ୍ଡ