ତଥାପି ମୋ ଗାଁ ହସୁଛି

            

     ଆଉ ଫୁଟୁନାହିଁ    କଦମ୍ବ କି କଇଁ 

        ପୁଷ୍କରିଣୀ ଅଛି ଖାଲି 

     ବାସୁ ନାହିଁ ଆଉ   ସେ ଧୂଳିର ବାସ୍ନା 

         କଂକ୍ରିଟ ରାସ୍ତା ଖାଲି ||

       ଚୂଲି ପାଖେ ଆଉ    ମେଳ ହୋଇଣ ତ 

          ବସୁ ନାହାଁନ୍ତି କେହି 

       ବୁଢ଼ୀ ମାଆ ଗପ   ଶୁଭୁ ନାହିଁ କାନେ 

           ଅତୀତରେ ଗଲା ରହି ||

        କୃଷକ ଭାଇ ହାତେ     ଲଙ୍ଗଳ ନାହିଁତ 

             ନା ଅଛି ବଳଦ ସାଥେ 

         ଗାଁର ନକ୍ସା ଏବେ    ବଦଳି ଗଲାଣି 

              ସମୟର ଗତି ଚକ୍ରେ ||

           

        ସନ୍ଧ୍ୟା ସମୟେ   ଦେଖିବାକୁ ମିଳେନି 

             ଘରେ ଘରେ ବତୀ ଡିବା 

         ସମୟେ ସାଥିରେ    ହଜିକି ଗଲାଣି 

             ଆଧୁନିକ ସତେ ଅବା ||

        ଏ ଆଖି ଆଉ     ଦେଖିବାକୁ ପାଉନି 

             ରିକ୍ସା କି ଶଗଡ଼ ଗାଡି 

          ମୋ ଗାଆଁ ଏବେ  ସହର ଲାଗୁଛି 

             ହସୁଛି ଏ ଘର ବାଡ଼ି ||

        ଘରେ ଘରେ ଆଉ   ଢ଼ିଙ୍କି ଦିଶୁନାହିଁ 

            ଝୋଟି କାନ୍ଥେ ଦିଶୁନାହିଁ 

         ଗାଈ ହମ୍ବା ରଡି   କାନେ ଶୁଭୁନାହିଁ 

             ଗାଈ ଗୋଠ ହଜିଲାଣି ||

          ରୂପ ରଙ୍ଗ ସତେ  ବଦଳି ଯାଇଛି 

            ତଥାପି ଏକତା ଅଛି 

          କର୍ପୁର ଉଡିଣ   କନା ପଡି ଅଛି 

            ତଥାପି ମୋ ଗାଁ ହସୁଛି  ||