ଠାକୁରାଣୀ
ଠାକୁରାଣୀ
ଭୋଦୁଆ ଗଲା ଶରତ ଖସିଲା
କାର୍ତ୍ତିକ ନୋହିଲା, କଥା ଦେଇଥିଲ
ଆମ ଗାଁ ଆଡେ ଆସିବାକୁ ରାଣୀ
ମଗୁସୁର ଆସି ହୋଇଲା,
ରାଣ ତୁମ ଠାରେ ରହିଲା ।
ସୁନା ପାଟ ଆମ ଗାଁ ପଛ ପଟ
ଆଗକୁ ନଈର ପଠାରେ
ସୋରିଷ ଫୁଲିଆ ତୁମ ଗୋରା ତନୁ
ଶାଢ଼ୀ ଢାଙ୍କି ହୋଇ ମଠାରେ ।
ଆମ ଗାଁ ମୁଣ୍ଡ ପଦୁଅଁ ପୋଖରୀ
କାଚକେନ୍ଦୁ ପାଣି ଭିତରେ
ଢୋଲିଆଣିଦେଵି ଭାର ଭାର ଫୁଲ
ପୂଜିବି କହୁଛି ସତରେ ।
ଲିପିପୋଛି ସଫା ସୁତରା କରିବି
ଖଟୁଲି ଥୋଇବି ଠାହାରେ
ଚାରିଆଡେ ଝୋଟି ଚିତା ପକେଇବି
ଘରକି ଦୁଆର ବାହାରେ ।
ମାଣ ବସେଇବି ସିନ୍ଦୁର ଲଗେଇ
ଜାତି ଜାତି ପନିପରିବା
ଶୁକ୍ଳ ଧାନ ଥୋଇ କଳସ ବସେଇ
ଗୁଆ କଉଡ଼ି କୁ ଭରିବା ।
ଘିଅ ଦୀପ ଦେଇ ଝୁଣା ଧୂଆଁ ପାଇ
ବନ୍ଦେଇବି ହୁଳହୁଳିରେ
ରଖିଛି ସାଇତି ପୂଜା ବହି ପଢି
ପୂଜିବି କହୁଛି, ଆସ ଠାକୁରାଣୀ
ମୋଘରକୁ ଥରେ ବୁଲିରେ ।