ହେବାକୁ ପଡିବ କର୍ମଠ

ଏଇ ପେଟ ପାଇଁ ଚାଲେ ସଦା ସଂସାର 

ଭିତରେ ସବୁ ନାଟ 

ବସି ଖାଇଲେତ ନଈ ବାଲି ସରେ, ତେଣୁ

ହେବାକୁ ପଡିବ କର୍ମଠ ।

ନିଜ ସ୍ବାର୍ଥେ ସମସ୍ତେ ତ ବନ୍ଧା, ତାହାକୁ 

ନଜଗିଲେ ଚାଲି ଯିବ ପ୍ରାଣ

ଦୁଷ୍କର୍ମ ନକରି ପର ଦୁଃଖେ ଦୁଃଖୀ ହୋଇ 

କର୍ମ କରିଲେ ହୁଏ ତ ମହାନ ।

ପରକୁ ହିଂସା, ପର ଧନେ ଲୋଭ ଥାଇ 

କର୍ମ କରିଲେ ହୁଏ ଅମଙ୍ଗଳକାରୀ

ପାଏନି ଥଳ କୂଳ, ପାଏନି ସଂସାରରେ ଯଶ, 

ନିଜ କର୍ମ ଫଳେ ବୋଲାଏ ହତଶ୍ରୀ ।

ଜୀବନର ତତ୍ତ୍ୱ, ନିଜ କର୍ମ କରିଯାଅ ନରଖି 

ଫଳର ଆଶା ନୂହେଁ କି ବିଚିତ୍ରମୟ    

ଏ ତତ୍ତ୍ୱ ସ୍ୱର୍ଗୀୟ ସୁଷମାଠୁ ବଳି ଶ୍ରେଷ୍ଠ, କାରଣ 

ଏ ଭବ ରଙ୍ଗେ ଆମେ କରୁ ତ ଅଭିନୟ ।

ଉପରୋକ୍ତ ସୁଧାମୟ ଚିନ୍ତା, ଅନୁଭବରୁ ସୃଷ୍ଟ, 

ପବିତ୍ର ମନର ମୁଗ୍ଧ ଅନୁଚିନ୍ତା 

ଵିଶ୍ଵାସର ଭାଷା, ପ୍ରାପ୍ତିର ପୁଲକେ ହୁଏ ଆଶା 

ପରିପୂର୍ଣ୍ଣ, ମିଳେ ଅଖଣ୍ଡ ପୂର୍ଣ୍ଣତା ।

ଏହି ଗଭୀର ଚିନ୍ତନ ଗଭୀର ଦର୍ଶନ ମାନସ 

ଜ୍ୟୋତିରେ ଜ୍ଞାନର ପୀୟୂଷ

ଏହା ଦ୍ୱାରା ହେବା ସଂକଳ୍ପିତ, ନବ ରୂପାୟନେ 

ପାଇବା ଆମେ ଶାନ୍ତିର ସ୍ପର୍ଶ  ।