ଟେଲିଭିଜନ
ଟେଲିଭିଜନ
କାହାଣୀଟିଏ ଶୁଣିବେ ବୋଲି
ନାତି ନାତୁଣୀମାନେ ।
ଘେରି ବସିଲେ ଆଈ ପାଖରେ
ଆଈ ଶୁଣାନ୍ତି ଦିନେ ।୧।
ଦେଖୁଛ ପିଲେ ଟେଲିଭିଜନ
ଶୁଣିବ କଥା ତାର ।
କିଏ ଗଢିଲା କେବେ କଅଣ
ଅତୀତ କି ଏହାର ।୨।
କହିଲେ ପିଲେ ଶୁଣିବୁ ଆଈ
କହ ତାହାର କଥା।
ଆଈ କହିଲେ ଶୁଣ ତା ହେଲେ
ଇଏ ବିଜ୍ଞାନ କଥା ।୩।
ବୈଜ୍ଞାନିକ ବେଅର୍ଡ ପହିଲେ
ଟେଲିଭିଜନ କଲେ ।
ଊଣେଇଶ ଶ ଛବିଶି ମସିହାରେ
ସଫଳ ହେଲେ। ୪।
ସର୍ବ ପ୍ରଥମ ଧାରାବାହିକ
ତା ଦଶ ବର୍ଷ ପରେ ।
ପ୍ରସାର ହେଲା ପ୍ରଥମ କରି
ସାରା ଆମ ବିଶ୍ବରେ ।୫।
ପ୍ରଥମ କରି ଅଠର ଶହ
ବାଉନ ଖ୍ରୀଷ୍ଟାବ୍ଦରେ ।
ରଙ୍ଗୀନ ଟେଲିଭିଜନ ଦୃଶ୍ଯ
ହେଲା ଆମେରିକାରେ ।୬।
ଆଲୋକ ଅନ୍ଧାରର ଏ ଖେଳ
ଟେଲିଭିଜନଟିଏ ।
ବିଦ୍ୟୁତ ଦ୍ବାରା ବସ୍ତୁର ଛବି
ଗ୍ରହଣ କରେ ସିଏ ।୭।
ଗ୍ରାହକ ଯନ୍ତ୍ର ପ୍ରେଷକ ଯନ୍ତ୍ର
ରହିଛି ତା ଭିତରେ ।
ଆଲୋକରଶ୍ମି ଛବିରେ
ତଡିତ୍-ତରଙ୍ଗ ସୃଷ୍ଟି କରେ ।୮।
ଏଇ ତରଙ୍ଗ ସବୁ ଦିଗକୁ
ଖେଳାଇ ହୋଇଯାଏ ।
ଆଲୋକରଶ୍ମି ତୀବ୍ରତାରେ ତା
ହ୍ରାସ ବୃଦ୍ଧି ବି ହୁଏ ।୯।
ଗ୍ରାହକ-ଯନ୍ତ୍ର ଉପରେ ଏକ
ପରଦା ଥାଏ ରହି ।
ଏଇ ପରଦା ଉପରେ ବସ୍ତୁ
ପ୍ରତିଛବି ପଡଇ ।୧୦।
ଚିତ୍ରଗୁଡିକ ଫୁଟି ଉଠଇ
ଏଇ ପରଦା ପରେ ।
କଣ୍ଠସ୍ବର ବି ଶୁଣୁଛେ ଆମେ
ତା ରେଡିଓ ଯନ୍ତ୍ରରେ ।୧୧।
ବହୁ ଦୂରର ଚିତ୍ର ଓ ଶବ୍ଦ
ଟେଲିଭିଜନ ଦେଇ ।
ଆସୁଛି ଆମେ ଦେଖୁଛେ ସବୁ
ମନ ନିଏ ରଞ୍ଜାଇ ।୧୨।