ତ୍ରିରଙ୍ଗା(ଛନ୍ଦ-ଆଷାଢ଼ଶୁକ୍ଳ)

ଦେଖରେ ଦେଖ ଉଡ଼ଇ ତ୍ରିରଙ୍ଗା

ହୃଦୟ ନିର୍ମଳ ମନଟି ରଙ୍ଗା

ସରବେ ତା' ମନ୍ତ୍ରେ ହେଲେ ମନ୍ତ୍ରିତ

ଜାତୀୟତା ବୋଧ ନିଶ୍ଚେ ଜାଗ୍ରତ

ଯେତେ ଭେଦାଭେଦ

ମନରୁ ହଟିବ ହେବା ଆନନ୍ଦ ।

ତିନୋଟି ରଙ୍ଗର ଏହି ପତାକା 

ନାରଙ୍ଗୀ, ଧଳା, ସବୁଜର ଶିଖା

ନାରଙ୍ଗୀ ରଙ୍ଗ ସାହସ, ବୀରତ୍ବ

ଧଳା ପବିତ୍ରତା, ଶାନ୍ତି ଓ ସତ୍ୟ

ରଙ୍ଗଟି ସବୁଜ

ସମୃଦ୍ଧି, ଶ୍ରମ, ବିଶ୍ବାସର ସାଜ ।

ଅଶୋକ ଚକ୍ର ଗାଢ଼ ନୀଳ ରଙ୍ଗ

ନ୍ୟାୟ, ଧର୍ମ, ପ୍ରଗତିର ପ୍ରତୀକ

ମଝି ଧଳା ରଙ୍ଗେ ତାହାର ଖ୍ୟାତି

ଚବିଶ ଅରରେ ରଖି ବିସ୍ତୃତି 

ଉଡ଼ି ଫରଫର

ଗରବ ଗଉରବ ଭାରତର ।

ତାହା ତଳେ ସର୍ବେ ହୋଇ ଏକତ୍ର 

ଗାଉଥିବା ସ୍ବାଭିମାନର ମନ୍ତ୍ର

ଏହାଠାରୁ ପୂଣ୍ୟ କିଛି ବି ନାହିଁ

ଜୀବନ ଉତ୍ସର୍ଗ ତାହାରି ପାଇଁ

ସପଥ ନେବାରେ

ଆମେ ସରବେ ନିଃଶ୍ବାର୍ଥ ମନରେ ।