ଚିଠି ମୋର ସ୍ମୃ୍ତି ଚିତ୍ର

ଭାବର ଆଦାନ ପ୍ରଦାନ ମାଧ୍ୟମ 

   ସ୍ମୃ୍ତିର ଝଲକ ଚିଠି , 

ଦୃଷ୍ଟି ଆଢୁଆଳେ ରହିଛି ଗୋପନେ 

   ହଜିଛି ଲେଖନୀ କାଠି ॥ 

ଯାନ୍ତ୍ରିକ ଯୁଗରେ ହଜି ଯାଇଛିରେ 

    ସୁମଧୁର ଚିଠି ଲେଖା , 

ଅତି ପୁରାତନ ଏ'ଚିଠି ସମ୍ପଦ 

    ହରେଇଛି ବନ୍ଧୁ ସଖା ॥ 

ବୈଷୟିକ ମନ୍ତ୍ର ଦୀକ୍ଷାରେ ଦୀକ୍ଷିତ 

    ସଭ୍ୟ ସମାଜ'ର ଜନ , 

ନିମିଷକ ମଧ୍ୟେ ଖବର ପୋଷଣେ 

    ଚିଠିରେ ଦିଏନି ଧ୍ୟାନ ॥ 

    

ଭୁଲିସେ ଯାଇଛି ଅତୀତକୁ ଆଜି 

     ଲଫାପା ଯାଇଛି ଚିରି , 

ସାଧା କାଗଜରେ ଅକ୍ଷର ନଦିଶେ 

     ପ୍ରେମମନ ଯାଏ ମରି ॥

ଚିଠି ଟିକି ପକ୍ଷୀ ଉଡିତ ପାରୁନି 

     ଡେଣାଟି ଯାଇଛି କଟି , 

ଡ଼ାକଘର ଥଳି ଉଇ ଖାଇଲାଣି 

    ପରସ୍ତେ ପରସ୍ତେ ମାଟି ॥  

  

ବଇରି ସାଜିଛି ଏ'ସମାଜ ଆଜି 

      ଚିଠିକୁ ଯାଇଛି ଭୁଲି , 

ମେସେଜେ ଚାଟିଂଗ ମୋବାଇଲ ପ୍ରୀତି 

     ଉଚ୍ଛୁଳି ପଡୁଛି ଖାଲି ॥ 

    

ଭ୍ରାମ୍ୟଭାଷ୍ଯେ ପ୍ରେମ ଲାଗଇ ବିଷମ 

     ଚିଠିକୁ ତ' ଅଣଦେଖା , 

ପ୍ରୀତି ପ୍ରିୟତମା ଲେଖନୀ ଧରେନା 

     ନିତି ଖୋଜେ ନୂଆ ସଖା ॥ 

 

ବିନା ସ୍ପର୍ଶେ ଏଠି ପଢି ହୁଏ ଚିଠି 

    ବୈଷୟିକ ଚିନ୍ତାଧାରା , 

ହୃଦୟର ଭାଷା ଖେଳିଯାଏ ପରା 

    ନିମିଷକେ ବିଶ୍ୱ ସାରା ॥

ପୁରୁଣା ଦିନର ହୃଦୟ ବିଭବ 

     ଚିଠି ଆଜି ସ୍ମୃତି ଛବି , 

ହାୟରେ ମଣିଷ କାହିଁ କଲୁ ପର 

    ଚିନ୍ତନରେ ଅଛି କଵି ॥ 

ସୀମା ସୈନିକର ସନ୍ଦେଶ ସର୍ବସ୍ଵ 

     ଚିଠି ହିଁ ପରାଣ ମିତ , 

ଏ'ଚିଠି ଚଢେଇ ଆପଣାର ସାଜି 

     ବାରତା ଦିଅଇ ସତ ॥ 

ବୃଦ୍ଧ ପିତାମାତା ପ୍ରିୟତମା ଭାର୍ଯ୍ୟା 

    ଡ଼ାକବାଲା ଅପେକ୍ଷାରେ , 

ସୀମାରୁ ଆସିଛି ଅମୂଲ୍ୟ ଏ'ଚିଠି 

    ମନଉଡେ ଆକାଶରେ ॥ 

ବୀରପୁତ୍ର ବର ମନର ମଣିଷ 

     ଆସିବ ତ' ଅବକାଶେ , 

ଏ'ଚିଠି ସନ୍ଦେଶ କରୁଛି ଅଥୟ 

    ଦିନଗଣି ପ୍ରିୟା ହସେ ॥