ଅକୁହା କଥା

ଅକୁହା ସେ କଥା ହୃଦେ ଦିଏ ବ୍ୟଥା

ପଥର ପଡିଲେ ସହି

ସଂସାର ସ୍ରୋତରେ ବିବେକ ନାବରେ

ମନ ଯେ ନାବିକ ହୋଇ ll

ସାରଥୀ ପ୍ରାଣର ପତି ପ୍ରାଣେଶ୍ୱର

ନିଶାରେ ହୋଇ ମାତାଲ 

ପର ନାରୀ ହରେ ନିର୍ଯ୍ୟାତିତା କରେ

ମାଡ଼ ମାରି କଲବଲ ll

ଦାରୁଣ ସେ ଦୁଃଖ ନାରୀ ଦେହ ସୁଖ

ପର ପୁରୁଷକୁ ଚାହେଁ

ସନ୍ଦେହ ବଇରୀ ସୁଖ ଦିଏ ସାରି

ଅଣଚାଶ ଦୁଃଖ ବହେ ll

ବୋହୂର ଗଞ୍ଜଣା ଉଗ୍ରରେ ମାଜଣା

ଅଣ୍ଟି ନିଆଁ ରଡ଼ ବେଶୀ 

ପ୍ରେମ ବାତ୍ସଲ୍ୟର ମୂଲ୍ୟ ହତାଦର

ବାର୍ଦ୍ଧକ୍ୟରେ ଏକାଦଶୀ ll

ସେବାରେ ସନ୍ତାନ ବିଦେଶ ଗମନ

ଛପନ ଇଞ୍ଚିଆ ଛାତି

ବାର୍ଦ୍ଧକ୍ୟ କଠୋର ନିଃସଙ୍ଗ ସେବାର

ଏକୁଟିଆ ମରେ ନିତି ll

ପଇସାର ବଳେ ନିଶା ପଶା ଖେଳେ

ଅପଦାର୍ଥ ହେଲେ ପିଲା

ସମ୍ମାନ ଇଜ୍ଜତ ହୁଏ ଧୂଳିସାତ

ନିତି ଘରେ ହୁଏ ପାଲା ll

ଅକୁହା ବେଦନା ଝିଅ ଆନମନା

ଗୃହ ତ୍ୟାଗ ଅସଭ୍ୟତା

ହସର ଦୁନିଆଁ ଲାଗିଯାଏ ନିଆଁ

ଅକୁହା ମନର ବ୍ୟଥା ll

ଭାଇ ଯେ ରକ୍ତର ଭୁଲି ସମ୍ପର୍କର

ବଇରୀ ସାଜେ ଦାଣ୍ଡରେ 

କଥା ଅକୁହାର ନୁହେଁ କହିବାର

ଚିନ୍ତନେ ମଥାଟି ଘୂରେ ll

ସମ୍ପତ୍ତିର ମୋହ ମନର ଯେ କୋହ

ଅସ୍ୱୟା ସମ୍ପର୍କ ଛିଟା

ଅଶିକ୍ଷିତା ଗୁଣ ରାଜନୀତି ବାଣ

ଯନ୍ତ୍ରଣାରେ ନଟା ପଟା ll

ସଂସାର ହାଟରେ ମୋହ ଓ ମାୟାରେ

ସ୍ୱାର୍ଥଯେ ଆମ ସାରଥୀ

ଷଡ଼ ରିପୁ ରୋଗ ହୃଦ ଭାଗ ଭାଗ

କେହି ନୁହେଁ ଏଠି ସାଥି ll