Library
ସୁନ୍ଦର ଲାଗଇ
ସୁନ୍ଦର ଲାଗଇ
ସୁନ୍ଦର ଲାଗଇ ନୂଆବୋହୂ ପାଦେ ଥିଲେ ଅଳତା
ସୁନ୍ଦର ଲାଗଇ ବରଷା ପାଗରେ ଧରିଲେ ଛତା |
ସୁନ୍ଦର ଲାଗଇ ସିମନ୍ତିନୀ ଭାଲେ ସିନ୍ଦୂର ବିନ୍ଦୁ
ସୁନ୍ଦର ଲାଗଇ ତା ମଥା ଓଢ଼ଣା ବଦନ ଇନ୍ଦୁ |
ସୁନ୍ଦର ଲାଗଇ ଦେଉଳ ଚୂଳରେ ଉଡ଼ିଲେ ଧ୍ବଜା
ସୁନ୍ଦର ଲାଗଇ ଖଡ଼ଗର ଧାର ହୋଇଲେ ପଜା |
ସୁନ୍ଦର ଲାଗଇ ମାଆ କୋଳ ଶିଶୁ ଦରୋଟି ହସ
ସୁନ୍ଦର ଲାଗଇ କେଦାରେ କେଦାରେ ସବୁଜ ଶସ୍ୟ |
ସୁନ୍ଦର ଲାଗଇ ପର୍ବତ କନ୍ଦରୁ ଝରିଲେ ଝର
ସୁନ୍ଦର ଲାଗଇ ଶ୍ରୀକୃଷ୍ଣଙ୍କ ଶିରେ ମୟୂରପର |
ସୁନ୍ଦର ଲାଗଇ କଳା ମେଘ କୋଳେ ଦାମିନୀ ଖେଳ
ସୁନ୍ଦର ଲାଗଇ ଗାଆଁ ଦାଣ୍ଡେ ପିଲା ହୋଇଲେ ମେଳ |
ସୁନ୍ଦର ଲାଗଇ ଘରର କାନ୍ଥରେ ଅଙ୍କିତ ଝୋଟି
ସୁନ୍ଦର ଲାଗଇ ଆକାଶରେ ଗଲେ ବାଦଲ ଘୋଟି |
ସୁନ୍ଦର ଲାଗଇ ନୀଳ ପାରାବାରେ ଲହରୀ ମାଳ
ସୁନ୍ଦର ଲାଗଇ ଯୋଗୀ କରେ ଲାଉ ତୁମ୍ବାର ଥାଳ |
ସୁନ୍ଦର ଲାଗଇ ଗାଭୀ ଗୋଠେ ଥିଲେ ବୃଷଭବର
ସୁନ୍ଦର ଲାଗଇ କୁମୁଦ କମଳ ଶୋଭିତ ସର |
ସୁନ୍ଦର ଲାଗଇ ଗଗନରେ ଇନ୍ଦ୍ରଧନୁ ଛଟକ
ସୁନ୍ଦର ଲାଗଇ କୁସୁମରେ ଥିଲେ ବାସ ମହକ |
ସୁନ୍ଦର ଲାଗଇ ମାତୃଭାଷା ଲେଖାଥିବା ଫଳକ
ସୁନ୍ଦର ଲାଗଇ ରଙ୍ଗମଞ୍ଚେ ଥିଲେ ଭରା ଦର୍ଶକ |
ସୁନ୍ଦର ଲାଗଇ ଚିଲିକା ଜଳରେ ହଂସ ସାରସ
ସୁନ୍ଦର ଲାଗଇ ଧରଣୀରେ ଆମ ଭାରତ ବର୍ଷ |
ସୁନ୍ଦର ଲାଗଇ ବ୍ରାହ୍ମଣେ ତ୍ରିକଛ ବାସ ଭୂଷଣ
ସୁନ୍ଦର ଲାଗଇ ଋଷି ଶିରେ ଜଟାଶଟା ଶୋଭନ |
ସୁନ୍ଦର ଲାଗଇ ବସନ୍ତରେ ପିକ କୁହୁ ଝଙ୍କାର
ସୁନ୍ଦର ଲାଗଇ ମହାନଦୀ ଜଳେ ନୌକା ବିହାର |
ସୁନ୍ଦର ଲାଗଇ କାଳିଆ ବସିଲେ ନନ୍ଦିଘୋଷର
ସୁନ୍ଦର ଲାଗଇ ତ୍ରିରଙ୍ଗା ପତାକା ଉଡ଼ୁ ଅମ୍ବର |
