ଷୋଳକଳା ମିଶି

ଷୋଳକଳା ମିଶି ଗୋଟିଏ ତ କଳା

     ସେହି ପରା ନନ୍ଦବଳା

ଷୋଳଚକା ସାଥେ ନନ୍ଦିଘୋଷ ରଥେ

     ବସିଅଛି ଚକାଡୋଳା

ସେତ, ବିନା ଭକତରେ ପରା l0l

ଗୁଣ୍ଡିଚା ରାଣୀ ତ ହେଲେଣି ବାୟାଣୀ

    ନ ଦେଖି ଜଗା ବଳିଆ

ଚାହିଁ ଚାହିଁ ପାଣି ଆଖିରୁ ମଲାଣି

    ବରଷକେ ଥରେ ଆ ଆ

ମାଉସୀ ଚାହିଁଛି ଅଧା ବାଟରେ ତ

   କରିବା ପାଇଁ ସଂଖୋଳା l1l

ଗଡେ ନନ୍ଦିଘୋଷ ତାଳଧ୍ଵଜ ଆଉ

    ଦେବଦଳନ ଦାଣ୍ଡରେ

ଭକତର ଭାବ କରିଲ ଅଭାବ

    ପରାଣ ଥାଇ ପିଣ୍ଡରେ

ନେଇଯାଅ ପ୍ରଭୁ ଏହି ପରାଣକୁ

     କରିବା ଆଗରୁ ଲୀଳା l2l