ସ୍ୱାଗତ ସମ୍ଭାର

ଶରତ ଆସିଛି

  ସରାଗେ ମରତେ

     ଧରି ନାନା ଉପହାର

ସରଗ ସୁଷମା

  ପଡୁଅଛି ଝରି

     ସର୍ବେ ଆନନ୍ଦେ ବିଭୋର.

ନଈ ପଠା ଧାରେ

  କାଶତଣ୍ଡୀ ହସେ

    ଶୁଭ୍ର ସ୍ୱଚ୍ଛ ସ୍ମିତହସ 

ସ୍ୱଚ୍ଛ ଜଳରାଶି

  ସମ୍ପୂର୍ଣ୍ଣା ସରସୀ

    ଅତି ମନୋହର ବେଶ.

କୁମୁଦ ପ୍ରଣୟେ

   ବିଭୋର ଚନ୍ଦ୍ରମା

     ଝରିପଡ଼େ ମଧୁଜ୍ୟୋତ୍ସ୍ନା 

ନୀଳ ଆକାଶର

   ନୀଳିମାରେ ଭିଜି

    ନଦୀ ହୁଏ ନୀଳବର୍ଣ୍ଣା.

ଜହ୍ନି ଫୁଲ ଫୁଟି

   ହସୁଛି ଅଗଣା

     ମଧୁପ ଗାଉଛି ଗୀତ

କୁଆଁର ପୁନେଇଁ

  ଜହ୍ନ ପୂଜିବାକୁ

    କୁମାରୀ ହେଲେଣି ରତ.

ଅଶିଣ ଆସିଛି

  ଜ୍ୟୋତି ପ୍ରକାଶୁଛି

    ମାଆଙ୍କର ଆଗମନେ

ଅସୁର ବିନାଶି

  ଶାନ୍ତି ମୁକ୍ତି ପ୍ରେମ

    ସଂସ୍ଥାପିବେ ପ୍ରତି ମନେ.

ସ୍ୱାଗତ ବନ୍ଦନା

  ଗାଏ କୁମ୍ଭାଟୁଆ

    ଶେଫାଳି ସଜାଏ ବାଟ

ପବନ ବଜାଏ

  ବଂଶୀ ବାଉଁଶରେ

    ବସିଛି ଶୋଭାର ହାଟ.

ମୁକୁତା ପାଲଟେ

  ଶରଦ ଶିଶିର

     ଝରିପଡ଼େ ଗୋପନରେ

ଦେବୀ ଦଶଭୁଜା

  ହେବେ ଆବିର୍ଭାବ

     ନବରାତ୍ର ଅବସରେ.

ଆସ ମା ଶାରଦା

  ଅଭୟ ବରଦା

    ଆସ ଧରା ଅବତରି

ଶାରଦୀୟ ଋତୁ

  ହେଉ ସ୍ମରଣୀୟ

     ପାଇ ଆଶିଷ ତୁମରି ।