ଦେବୋପମ ଦେବ ଭୂମି

    ଅଶି ମଉଜାର  ଜନତାଙ୍କ ପାଇଁ

    ଅଶି ଏକର ଏ ଦେବୋପମ ଭୂଇଁ

      ବିଜେ ଶହେ ଆଠ ଦୋଳ

    ନାଶି ସୋମ କଷ୍ଟ ନାମ ସୋମନାଥ

         ଥାନାପତି ସଭିଙ୍କର ।

    ପଞ୍ଚୁ ଦୋଳେ ହରି ରାଜ ପୁର ଠାରେ

    ହୁଅନ୍ତି ମିଳନ    ମହା ଆଡ଼ମ୍ବରେ

       ଶୁଭେ ଟମକ ନିଶାଣ

    ହରି ହର ଭେଟ   ପଶ୍ଚିମା ଶମ୍ଭୁ ତ

       କମ୍ପି ଉଠେ ମଇଦାନ ।

    କୃତ୍ରିମ ତାରାରେ   ଝଲସେ ଗଗନ

    ବୁଢ଼ା ବୁଢ଼ୀ ଘୋଡ଼ା ନାଚ କିଣେ ମନ

       ଝୁଲି ଝୁଲି ଆସେ ଦୋଳ

    ମନ ମତାଣିଆ   ତାଳରେ ଘଣ୍ଟୁଆ

       ବାଜେ ଖୋଳ କରତାଳ ।

    ଚମକି ଉଠଇ  ମେଳଣ ପଡିଆ

    ଭାବ ବିହ୍ଵଳିତେ ଫଗୁ ଦିଆନିଆ

       ରୁଣ୍ଡ ଲକ୍ଷ ଲକ୍ଷ ଭକ୍ତ

    ସତେ ଅବା ପୁରୀ ସବୁ ଅଛି ପୂରି

      ହୁଏ କେତେ ଭୋଜି ଭାତ ।

    ଓଡ଼ିଆ ସଂସ୍କୃତି ପ୍ରଥା ପରମ୍ପରା

    ସ୍ନେହ ମମତାର ଏହି ଭାଇଚାରା

       ସ୍ବର୍ଣ୍ଣାକ୍ଷରେ ଇତିହାସେ

    ଲିପିବଦ୍ଧ ହୋଇ ପୃଷ୍ଠାକୁ ମଣ୍ଡଇ

       ହରି ହର ରଙ୍ଗ ରସେ ।