ସଂଘର୍ଷ ମୋ ଚାଲିଥିବ

ମୋ କଥାକୁ କେହି ଶୁଣୁ ବା ନ ଶୁଣୁ

ହିତକଥା କହି ଚାଲିଥିବି,

ମୋ ଲେଖାକୁ କେହି ପଢୁ ବା ନ ପଢୁ

ସବୁଦିନ ଲେଖି ଚାଲିଥିବି |

ମୋ ଗୀତକୁ କେହି ଗାଉ ବା ନ ଗାଉ

ବହିଛାପି ସାରି ବାଣ୍ଟୁଥିବି,

ମୋ ଭାବକୁ କେହି ବୁଝୁ ବା ନ ବୁଝୁ

ନିଜ ବିଚାରକୁ ରଖୁଥିବି |

ମୋତେ କେ ପସନ୍ଦ କରୁ ବା ନ କରୁ

ତାଙ୍କୁ ମୁଁ ପସନ୍ଦ କରୁଥିବି,

ମୋ ପଥେ ପଥିକ ମିଳୁ ବା ନ ମିଳୁ

ସତ୍ୟପଥେ ଏକା ଚାଲୁଥିବି |

ମୋତେ କେ ପଚାରୁ ଅବା ନ ପଚାରୁ

ତାଙ୍କ ଭଲ-ମନ୍ଦ ପଚାରିବି,

ମୋ ପାଖକୁ କିଏ ଆସୁ ବା ନ ଆସୁ

ତାଙ୍କ ଚାରିପଟେ ଘୂରୁଥିବି |

ମୋତେ କିଏ କିଛି ଦେଉ ବା ନ ଦେଉ

ମିଠାକଥା ପଦେ କହୁଥିବି,

ମୋତେ କିଏ ଭଲ ପାଉ ବା ନ ପାଉ

ସଭିଙ୍କୁ ମୁଁ ଭଲ ପାଉଥିବି |