ସମୟ

ସମୟ କୋଳରେ ସାଇତା ପ୍ରଶ୍ନର ସମୟ ଦିଏ ଉତ୍ତର

ସମୟ ଶିଖାଏ କିଏ ପର ଏଠି ଆଉ କିଏ ଆପଣାର  ।

ସମୟ ଚକରେ ଗଡ଼ି ଗଡ଼ି ଚାଲେ ଆମ ଏ ଜୀବନ ରଥ

ସମୟ ଆଦେଶେ, ରାତି ଆସେ ଏଠି, ଆସଇ ପୁଣି ପ୍ରଭାତ ।

ସମୟ ରଚଇ କେତେ ପ୍ରଶ୍ନ-ବ୍ୟୁହ, ମିଳେନା ଉତ୍ତର ଯା'ର 

ସମୟ କୋଳରେ ସାଇତା ପ୍ରଶ୍ନର ସମୟ ଦିଏ ଉତ୍ତର   ।

ସମୟ ଅଧିର ,ସମୟ ନିଷ୍ଠୁର, ସମୟ ହିଁ ବଳଶାଳୀ

ସମୟ ଆକ୍ରୋଶେ, ଝରିଯାଏ ନିତି, ଜୀବନ ରୂପୀ ଶେଫାଳି ।

ସମୟ ଦେଖାଏ ମିଠା ମିଠା ସ୍ଵପ୍ନ, ଦିଏ ପୁଣି ପ୍ରତାରଣା 

ସମୟ ହାତରେ ବନ୍ଧା ଭାଗ୍ଯଡ଼ୋରୀ,ଖେଳଇ ଭାବି ଖେଳଣା ।

ସମୟ ପରଖେ ସଭିଁଙ୍କୁ ଜୀବନେ, ଦେଇ ଦୁଃଖ ବାରମ୍ବାର

ସମୟ ଶିଖାଏ କିଏ ପର ଏଠି ଆଉ କିଏ ଆପଣାର   ।

ସମୟ ସାଗରେ, ଢେଉ ରୂପେ ଖେଳେ ଜୀବନରେ ଦୁଃଖ-ସୁଖ

ସମୟ ଶେଯରେ ବିତଇ ଜୀବନ, ବାଳୁତ-ଯୁବା-ବାର୍ଦ୍ଧକ୍ୟ ।