ସ୍ମୃତିର ସିନ୍ଧୁକ

କାଲି ମୁଁ ଯେ ତୁମ ସାଥେ 

ଥିବି କି ନଥିବି

କିଛି ସ୍ମୃତି ତୁମ ପାଇଁ 

ଛାଡ଼ି ଯାଇଥିବି ।

ମୋ କଥା ତୁମର ଯେବେ 

ମନେ ପଡିଯିବ

ସ୍ମୃତିର ସେ ସିନ୍ଧୁକକୁ 

ଫିଟାଇ ଦେଖିବ ।

ଯେତେ ସବୁ ଉପହାର 

ଦେଇଥିଲ ମୋତେ

ଦେଖିବ ମୁଁ ସାଇତିଛି

ଜତନରେ କେତେ ।

ବେଶି ଯଦି ମନେପଡେ 

ସେ ସବୁକୁ ଦେଖି.....

କୋହକୁ ସମ୍ଭାଳିନେବ

ନ ଭିଜାଇ ଆଖି ।

ରହିଯିବ ଆମ ଗଳ୍ପ

ହୋଇ ଅଧାଲେଖା

ଏ ଜନମେ ଆଉ କେବେ

ହେବ ନାହିଁ ଦେଖା ।

ଆଉ କେବେ ମୋତେ ତୁମେ

ପାଇବନି ଖୋଜି

ସ୍ମୃତିରେ ହଜିବ ଯାହା

ଆଖିଦୁଇ ବୁଜି ।

ଶରୀରଟା ପୋଡ଼ି ଜଳି

ହୋଇଲେବି ଲୀନ

ଏ ଆତ୍ମା ରହିବ ତୁମ 

ପାଶେ ସବୁଦିନ ।