ସ୍ମୃତି ଓ ପ୍ରଶ୍ନ

ମୁହଁଟି କୋମଳ ଉଜ୍ଜ୍ବଳ ସୁନ୍ଦର 

ହସଧାର ରଶ୍ମିରେଖା

ସ୍ବଚ୍ଛ ହୃଦୟରେ ଗଭୀର ବିଶ୍ବାସ 

ତଲ୍ଲୀନତା ଏକାତ୍ମତା ।

ଆଖିରେ ଆଖିଏ ଅସୀମ ଜିଜ୍ଞାସା

ମନରେ ପ୍ରଶ୍ନ ଅନେକ

ସୂତ୍ର ସମାଧାନ ପାଇଁ ତତ୍ପରତା

ଅବ୍ଯର୍ଥ ଜୀବନ ଲକ୍ଷ୍ଯ ।

ହୃଦୟରେ ଜାଳି ଜ୍ଞାନର ଦୀପାଳୀ

ଉତ୍ସୁକେ ପଥକୁ ଚାହିଁ

ରହୁଥିଲ ନିତି ହୋଇ ସୁପ୍ରସ୍ତୁତ

ସନ୍ଦେହ ମୋଚନ ପାଇଁ ।

କର୍ମ ଓ ବଚନେ ଭାବ ଏକନିଷ୍ଠ 

ଗଭୀର ଅଧ୍ୟବସାୟୀ

ପ୍ରଶ୍ନର ଉତ୍ତର ଖୋଜି ସମାଧାନ 

କୃତାର୍ଥ ହୋଇଛି ମୁହିଁ ।

ଖୋଜିଛି ଖୋଜୁଛି ଜାଗ୍ରତେ ସ୍ବପନେ

ସ୍ରୋତଧାର ଅନୁକୂଳେ

ଗୋଟାଉଛି ଯତ୍ନେ ଶିପ ଶାମୁକାକୁ

ରତ୍ନ ମଣି କୁତୁହଳେ ।

ନିରେଖୁଛି ବସି ନୀଳ ନୀଳିମାକୁ

ସଞ୍ଜେ ଉଏଁ ତାରା ଜହ୍ନ 

ବିକାଶ ଉନ୍ମୁଖୀ ଗୋଲାପ କଳିରେ

ଜାଗେ ସ୍ମୃତି ପ୍ରଶ୍ନ ଚିହ୍ନ ।