ସଖୀର ପ୍ରେମ

ଏତେ ଭଲ ମୋତେ ପାଅ ନାହିଁ ସଖୀ

ଲଗାଅନି ଏତେ ଭାବ

ଦିଅ ନାହିଁ ସଖୀ ଦିଅ ନାହିଁ ମୋତେ

ଅମୃତର ଅନୁଭବ

ଜୀବନ ମରୁରେ ମରୁଝର ତୁମେ

ଶୋଷିଲା ତଣ୍ଟିର ଆଶା

ମୂକଟିଏ ଥିଲି ତୁମେ ଝରାଇଲ

ମୋ କଣ୍ଠୁ ପ୍ରୀତିର ଭାଷା

ଆଖିରେ ଖଞ୍ଜିଲ ରଙ୍ଗର ଫୁଆରା

ରଙ୍ଗୀନ ଦିଶିଲା ଧରା

ତୁମେ ସଖୀ ମୋର ଚଇତି ଆକାଶ

ତୁମେ ମୋର ପ୍ରୀତିଧାରା

ତୁମ ପାଇଁ ସଖୀ ହୃଦୟରେ ମୋର

ମିଠା ମିଠା ପ୍ରୀତିଝର

ତୁମ ପାଇଁ ସଖୀ ଆଖି ତଳେ ମୋର

ସପନର ଗନ୍ତାଘର

ମୋ ଜୀବନପଥେ କେତେ କେତେ ଫୁଲ

ବିଛାଇ ଦେଇଛ ସଖୀ

ଅମା ଅନ୍ଧାରରେ ମୋ ପାଇଁକି ସଖୀ

ସରଜିଛ ଜହ୍ନରାତି

ଭଲପାଏ ବୋଲି କେମିତି କହିବି

ମୁଁ ଏକ ଛୋଟିଆ ଜୀବ

ତୁମେ ପ୍ରାଣମୟୀ ହୃଦୟ ଈଶ୍ୱରୀ

ପ୍ରଣୟ ବିଭୋର ଭାବ

ପାଖରୁ ଟିକିଏ ଅନ୍ତର ହୋଇଲେ

ଓଦା ହୋଇଯାଏ ଆଖି

ସେପାଇଁ କହୁଛି ଭଲ ପାଅନାହିଁ

ଭଲ ପାଅନାହିଁ ସଖୀ