ଶ୍ରାବଣ ଆସିଲା
ଶ୍ରାବଣ ଆସିଲା
ଶ୍ରାବଣ ସନ୍ଧ୍ୟାରେ ଭାରି ମନେପଡ଼େ
ତୁମରି ଅଧର ହସ
ଫିକା ଅନ୍ଧାରରେ ଅବାଧ୍ୟ ମନର
ମେଣ୍ଟିଯାଏ ଅବଶୋଷ।
ଚପଳା ଚମକେ ନିମିଷକେ ଆସି
କୁଆଡେ ଉଭେଇ ଯାଅ
କେବେ କେବେ ଆସି ବାତାୟନ ପାଶେ
ମୋ ମନ ପରଖୁଥାଅ ।
ଭାବରେ ଭିଜାଇ ପ୍ରୀତିରେ ମଜ୍ଜାଇ
ମୋ ହୃଦେ ବସା ବାନ୍ଧୁଛ
କେବେ କେବେ ପୁଣି ଅଭିମାନ କରି
ଆଡ ରୁଷା ଦେଉଅଛ ।
ଜହ୍ନି ଫୁଲ ଓଠେ ତୁମ ମିଠା ରଙ୍ଗ
ଦେଇଅଛ କିବା ବୋଳି
ଅନୁଭବେ ମୋର ଆସୁଅଛ ସଦା
ପ୍ରୀତି ରଙ୍ଗ ଟିକେ ବୋଳି ।
ଶ୍ରାବଣ ସନ୍ଧ୍ୟାରେ ତୁମ ସାଥେ ହେଲା
ଅୟୁତ ମନର କଥା
ଆଜି କିଆଁ ସବୁ ଅନ୍ତର ହୋଇଲା
ଭାବିଲେ ଲାଗଇ ବ୍ୟଥା ।
ସବୁ ଶ୍ରାବଣର ମିଠା ଅନୁଭୂତି
ମନକୁ ଦେଉଛି ହାଣି
ତୁମେ ସଦା ରହି ଗୋପନ ପୁରୀରେ
ମନକୁ ନେଇଛ କିଣି ।
ଜାଣେନା ତୁମେ ତ ଆସିବକି ନାହିଁ
ମୋ ମନର ପରିଧିକୁ
ସତେ ତୁମେ ବର୍ଷା ଭାରି ମନେପଡ଼
ଇଚ୍ଛାହୁଏ ଭିଜିବାକୁ ।